भांगरभूंय | प्रतिनिधी
भांगरभूंय । प्रतिनिधी
पणजीः केंद्रीय नार्कोटिक कंट्रोल ब्युरोच्या (एनसीबी) गोंय पंगडान खापो नायजेरियन ड्रग्ज तस्कर इवुआला उडोका स्टॅन्ली हाका अटक केली. तो आनी ताची घरकान्न सिमरन ऊर्फ उषा चंदेल हांणी ड्रग्जांच्या वेव्हारांतल्या एकठांय केल्ली 1.06 कोटी रुपया मोलाची मालमत्ता जप्त केल्या.
एनसीबीन सीआयडी कडल्यान मेळिल्ले म्हायती वयल्यान मुड्डोवाडो- साळगांव हागचया राजू साळगांवकार हाच्या रेन्ट अ बायक ऑपरेटरच्या घराचेच छापो घालून 7.35 ग्राम कोकेनची णव पाकिटां जप्त केल्ली. ताणे दिल्ले म्हायती वयल्यान एनसीबीन कांदोळी हांगच्या मायकल आनी झेवियर फर्नांडीस ह्या भावां कडेन चवकशी करून मायकल हाका अटक केली. त्या तिगांनी दिल्ले म्हायती प्रमाण तांणी इवुआला स्टॅन्ली हाचे कडल्यान ड्रग्ज विकतें घेतल्याचें सामकार आयलें.
एनसीबीन स्टेन्ली व्हो कांदोळी हांगा रावता ते सुवातेर छापो घातलो तेन्नाा तेलंगणा पुलिसांनी ताका अटक करून ताचे कडल्यान 8 कोटी रुपया मोलाची घुंवळी वखदा जप्त केल्ल्याची म्हायती मेळ्ळी. एनसीबीन अर्थीक वेव्हार पळोवपी ताची घरकान्न उपा चंदेल हिका अटक करून चवकशी केली तेन्ना तिणे आपल्या बँक खात्यांत फाटल्या वर्सा 4.20 लाख रुपया जमा जाल्ले तातूंतले 26.90 लाख रुपये आपणे काडले अशी म्हायती दिली. स्टॅन्ली विदेशी नागरीक आशिल्ल्यान ताचें बँक खाते ना आनी बायलेच्या खात्या वरवीं तो ड्रग्जाचो अर्थीक वेव्हार करतालो.
मजगतीं स्टॅन्लीचो मेवणो लखन चंदेल हाची एनसीबीन चवकशी केली तेन्ना आपल्या नांवार आशिल्ली सगली मालमत्ता आपली भयण आनी भावोजी स्टन्लीची आशिल्ल्याचें ताणे सांगलें. ते उपरांत एनसीबीन स्टॅन्लीक उत्तर गोंय जिल्हो आनी सत्र न्यायालया कडल्यान ट्रान्झिट रिमांडार बुधवारा गोंयात हाडून अटक केली. न्यायालयान ताका पांच दिसाची एनसीबी कोठडी दिल्या. एनसीबीन केल्ले चवकशेंत स्टेन्ली आनी उषा हांणी ड्रग्ज वेव्हारांतल्यान 1.06 कोटी रुपयांची मालमत्ता जमा केल्ल्याचें स्पश्ट जालें आनी तांणी ती सध्या तात्पुरती जप्त केल्या.
जप्त केल्ले मालमत्तेंत लखन चंदले हाच्या नांवार आशिल्लो कांदोळेच्या लुईस अपार्टमेंटांतलो 75 लाखांचो फ्लॅट, उषा चंदेलच्या नांवार आशिल्ली 8.5 लाखांची गाडी, उषा आनी तीन भुरगी आनी मेवण्याच्या नांवर 16 बँख खात्यांनी सेव्हिंग आनी फिक्स डिपॉझीटांत दवरल्ले 22.60 लाख रुपये हांचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
