भांगरभूंय | प्रतिनिधी
भांगरभूंय । प्रतिनिधी
म्हापशेंः शिवोलेचो आदलो आमदार आनी आदलो मंत्री दयानंद मांद्रेकार हांणी तांच्या घरा कडेन मुख्यमंत्री डॉ प्रमोद सावंत हांचे हाजेरेंत घेतिल्ले बसकेंत निश्ठावंत भाजपा कार्यकर्त्यांची खंत उक्तायली तशेंच काँग्रेस पक्षाचे उत्तर गोंयांतले उमेदवार रमाकांत खलप हांणी आपल्याक प्रचारांत मजत करपाची विनवणी केल्या हें लेगीत सांगून वडयलें.
रमाकांत खलप हांची उमेदवारी जाहीर जातगीर दुसऱ्याच दिसा तांणी वेंचणुकेंतल्या जैता खातीर आपल्या आशिर्वाद दिवचो अशें मागलें. म्हजे सदांच तुमकां आशिर्वाद आसतले अशें आपणे तांकां सागलें अशें स्पश्टवक्तेपणा खातीर नामना आशिल्ल्या मांद्रेकार हांणी बसकेंत मुख्यमंत्री, दत्ता खोलकार आनी कार्यकर्त्यांक सांगलें. विरोधकांक वेंचणुकेंत प्रचार करपाचो हक्क आसा आनी तांकां तें मेकळेपणान करपाक दिवपाक जाय अशें मत तांणी उक्तायलें. कोणाक मत दिवपाचें हे दरएकल्याचेर निंबून आसा अशेंय तांणी सांगून वडयलें.
निश्ठावंत भाजपा वापुरप्यांक कुशीक काडपाच्या प्रकारां खातीर मांद्रेकार हांणी खंत उक्तायली. हाका लागून बार्देशच्या दर्या देग वाठारांतल्या मतदारसंघात चलिल्ल्या राजकारणाचे मात्सो उजवाड पडलो. भाजपाच्या राजकी येसा खातीर मांद्रेकार हांणी आदले मुख्यमंत्री सर्गेस्त मनोहर परीकार हांच्या नेतृत्व गुणांची तोखणाय केली. तांणी केल्ल्या यत्नाक लागून 2012 वर्सा जाल्ले गोंय विधानसभेचे वेंचणुकेंत भाजपाक सादें भोवमत मेळपाक शकलें अशें तांणी सांगलें.
पक्षांतल्या हालींच्या घडणुकां विशीं उलयतना मांद्रेकार हांणी काँग्रेस पक्षाचे तिकेटीचेर आमदार म्हणून वेंचून आयिल्ली डिलायला लोबो हांका भाजपात घेवपा विशीं असंतोष उक्तायलो. दुसऱ्या पक्षांतल्या लोकांक पक्षांक घेवपाच्या ह्या प्रकारांक लागून निश्ठावंत कार्यकर्त्यांत वायट दिसप सभावीक आसा अशें तांणी सांगलें. डिलायला लोबो हांच्या सारक्या भायल्यांक भाजपांत घेतिल्ल्यान निश्ठावंत कार्यकर्त्यांनी पक्षा खातीर काम करपाची उमेद उणी जाल्या. कांय गजाली टाळप शक्य जायना हें तांणी समजून घेवपाक जाय अशें तांणी मुख्यमंत्र्यां कडेन पळोवन सांगलें.
मुख्यमंत्र्यांचे आवाहन
बसकेंत उलयतना मुख्यमंत्री डॉ प्रमोद सावंत हांणी शिवोलेंतल्या कार्यकर्त्यांक श्रीपाद नायक हांच्या जैता खातीर मतभेद कुशीक दवोरून वावुरपाचें आवाहन केले. मांद्रेकार हांका सत्तेंत आसप कितलें म्हत्वाचें हें खबर आशिल्ल्यान तांणी डिलायला लोबो हांच्या भाजपा प्रवेशाक विरोध केलो ना. उरफाटें तांकां पक्षांत घेतल्यार पक्ष घटमूट जाता जाल्यार तांकां पक्षांत तांणी येवकार दिल्लो हाची याद मुख्यमंत्र्यान करून दिली. पक्षाच्या उमेदवाराक आघाडी मेळता ती आमदाराक लागून न्हय जाल्यार ती कार्यकर्त्यांक लागून हें सांगपाक लेगीत ते विसरले नात.
लोकसभा वेंचणुकेंत भाजपाच्या दोनूय उमेदवारांक जैतिवंत करपाची गरज आसा. पक्षाच्या निश्ठावंत कार्यकर्त्यांक वांगडा घेवन काम करपाचो सल्लो आपणे डिलायला लोबो हांकां दिला. सध्याचे घडीक श्रीपाद नायक हांका जैतिवंत करपाचें आव्हान कार्यकर्त्यांनी स्विकारपाक जाय आनी दयानंद मांद्रेकार तातूंत फाटीं रावचे नात असो विश्वास तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
