भांगरभूंय | प्रतिनिधी
पणजी, प्रतिनिधी : हरवळेंच्या श्री रुद्रेश्वर देवळांत जाल्ल्या पालखी सुवाळ्या खातीर पुराय गोंयच्यान भंडारी समाज हाजीर आशिल्ले. त्या दिसा जाल्ल्या वादा संबंदीं कोणाचोच विचार घे नासतना समितीन केल्लो निवाडो भंडारी समाजाक मान्य ना. आयज सांजवेळा जावपी समाजाचे बसकेंत आमी देवळाचे समितीक हे विशीं जाब विचारतले अशें आप फुडारी आनी समाजभाव अमित पालेकार हांणी सांगलें.
रुद्रेश्वर देवळांत जाल्ल्या पालखी सुवाळ्या खातीर गोंयच्यान अडेज हजार भंडारी भावीक आयिल्ले. ह्या वेळार सुमार २५ जाणांनी खिळे लायिल्ले दांडे घेवन हांगा येवन मस्तेपणां केलीं. पुलिसांचेर आनी हेर भाविकांचेर फांतर मारले. बायलां वांगडा वायट वागले. ते विचारांत घेनासतना फकत एका दिसानूच देवस्थान समिती हो वाद मिटलो अशे म्हणपाकूच शकना. आयज जर हें मान्य केलें जाल्यार फाल्या हेर देवळांनीय असल्यो गजाली जावपाक शकतात, अशें पालेकार हांणी म्हणलें.
हातूंत राजकी हस्तक्षेप आशिल्ल्याची शक्यताय वाद जाले उपरांत देवळाचे समितीन उक्तायल्ली. तशेंच दुसरे समितीन आपल्याक कोणाचीच गरज नाशिल्ल्याचें मत उक्तायल्लें. उपरांत उपजिल्होधिकारी एका खाजगी जाग्यार बसका घेवन हो वाद मिटयतात. मात आमकां हें मान्य ना. असल्यो गजाली वेंचणुकेक माल पडपाक शकतात. हें समजल्या उपरांत कांय राजकी फुडार्यांनी हस्तक्षेप करून वाद मिटोवपाक लायलो. मात समितीन वाद कसो मिटयलो हाची जाप उत्तर गोंयच्या पुराय भंडारी समाजाक दिवप गरजेचें, अशेंय फुडें पालेकार हांणी म्हणलें.
मजगतीं, बोवाळ घालपी लोकांक उत्तर गोंय पुलीस अधीक्षक अक्षत कौशल हांणीच देवळांत भितर हाडिल्लें. उपरांत एसपी सुमार अर्द वर गायब आशिल्ले. असल्या पुलीस अधिकार्यांक परत दिल्लीक धाडचें अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
