भांगरभूंय | प्रतिनिधी
फोंडें, प्रतिनिधी: उसगांवां बस आनी कार हांचे मदीं जाल्ल्या अपघातांत गंभीर जखमी जाल्ल्या ६ म्हयन्यांच्या सानुल्याक गोमॅकोंत व्हरतना मरण आयलें. जखमी सानुल्याक पिळयेंच्या मुळाव्या भलायकी केंद्रांतल्यान गोमॅकोंत व्हरपा खातीर १०८ ऍम्बुलन्स सुमार देड वरां उपरांत उपलब्ध जाली. ताका लागून ताका गोमॅकोंत उपचारा खातीर व्हरपाक उशीर जालो. १०८ आयले उपरांत ताका गोमेकोंत व्हरतना मरण आयलें. अपघातात जखमी जाल्ली अमृता चौगुले ही बायलूय गुरुवारआशिल्ल्याचें स्पश्ट जालां. तिचेर सध्या गोमॅकोंत उपचार चलतात. अपघाताक कारण थारिल्ले कार चालक शंकर चौगुले हाचे आड फोंडें पुलिसांनी गुन्यांव नोंद केला. जखमी कार चालकाचेर गोमॅकोंत उपाचार सुरु आसा.
अपघाताची म्हायती
काल सांजेवेळार सांजेच्या सुमार ५.४५ वरांचेर जीए १२ टी ६९१२ ह्या नंबराची बस फोंडेंच्यान वाळपय वताली. नेस्ले कंपनी मुखार आशिल्ल्या वोल्ताचेर मुखारच्यान धोफरायत आयिल्ली मोटार (जीए ०६ टी ६०५९) चुकीचे दिकेन वचून प्रवाशी बशीक आपटली. तातूंत मोटारींतले ७ जाण गंभीर जखमी जाले जाल्यार बशींतले सुमार १२ जाण किरकोळ जखमी जाले. जखमींक थळाव्या लोकांनी खाजगी गाडयेंतल्यान पिळयें मुळाव्या भलायकी केंद्रांत दाखल केलें. थंय उपचार केल्या उपरांत मोटर चालक शंकर चौगुले (४८), पुजा चौगुले (४६), अमृता चौगुले (२४), पल्लवी आजगांवकार (२९, सगळीं रावपी दाबोळे, वास्को) आनी एके स म्हयन्यांचे चलयेक अदीक उपचारा खातीर गोमॅकोंत व्हेलें. फोंडेंच्या केतन भाटीकार आनी राजेश वेरेंकार हांणी जखमींक गोमॅकोंत व्हरपा खातीर आपल्यो ऍम्ब्युलन्सी दिल्यो. एकाच वेळार ३ सरकारी १०८ ऍम्ब्युलन्सी पिळयें हॉस्पिटलांत दाखल जाले उपरांत जखमींक ताकतिकेन गोमॅकोंत व्हेलीं. मात गोमॅकोंत व्हरतना वाटेर ते स म्हयन्यांचे सानुले चलयेक मरण आयलें.
हे विशीं पुलिसांनी कार चालका आड गुन्यांव दाखल केला. वास्को हांगच्या चौगुले आनी आजगांवकार कुटूंब बेळगांव वाठारांत देवदर्शनाक गेल्लें. सांजे वेळार परतना गाडी चालकाचो दोळो लागिल्ल्यान हो अपघात घडिल्ल्याचो दुबाव उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
