भांगरभूंय | प्रतिनिधी
नेवासा, खबरां संस्था: जनावरांनी केल्ली घाण, कोयर आनी शेण सांठयल्ले आदले बांयत पडिल्लें मांजर काडपा खातीर गेल्ल्या चल्या सयत ताका वयर काडपाक गेल्ल्या त्याच कुटुंबांतल्या आनीक पांच जाणांक बांयतले विखारी हवेक लागून बेशुद्ध जावन घुस्पटून मरण आयलें.
हे घडणुकेंत गंभीर जखमी जाल्ल्या एकाक खाजगी हॉस्पिटलांत दाखल केलां. ही घडणृक मंगळारा सांजेवेळार नेवासी म्हालांतल्या वाकडी हांगा घडली. विशाल ऊर्फ बबलू अनिल काळे (२३), अनिल बापूराव काळे (५८), बाबासायब पवार (३५), संदीप माणिक काळे (३६), माणिकराव गोविंदराव काळे (६५) अशीं मरण आयिल्ल्यांचीं नांवां जावन आसात.
वाकडी शिवाराती हांगा अनिल बापूराव काळे हांच्या शेतांत आशिल्ले आदले बांयत जनावरांचें शेण मूत सांठयल्लें. हे बांयत पडिल्लें माजर काडपा खातीर बबलू काळे हो गेलो. हे कळटांत ताचो बापूय अनिल काळे हे बांयत देंवले. मात ते भायर येवंक ना. हें पळोवन कुशीकच्या शेतांतलो बाबासायब काळे होय बांयत गेलो. मजगतीं, अनिलाचो चुलत भाव संदीप काळे हे रस्त्या वयल्यान वताले तांकां आवाज दिवन आपयलो. तेय बांयत देवले. बरोच वेळ तेय बांयतल्यान भायर येवंक ना. मजगतीं, अजय काळे (३६) हो भेंडाक दोरी बांदून बांयत देंवलो. ताका विखारी हवेचो दम लागिल्ल्यान तांणी आवाज केलो. ताका रोखडोच लोकांनी वयर काडलो. ताका खाजगी हॉस्पिटलांत दाखल केलो.
उपरांत अहमदनगर, श्रीरामपूर आनी छत्रपती संभाजीनगर हांगच्यान मजती खातीर टीम आपयली. रातच्या आठ वरां मेरेन ही टीम पावल्या उपरांत पांच कुडी बांयतल्यान भायर काडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
