भांगरभूंय | प्रतिनिधी
पणजी : भारतीय हवामान खात्यान वाडट्या तापमानाचो अदमास काडिल्ल्यान दृष्टी मरीन लायफगार्ड संस्थेन गिमाळ्यांत दर्यादेगेर, दर्यावेळेर वचपी लोकांची राखण करपा खातीर सुरक्षेचे सल्ले जारी केल्यात. राज्यांत फुडले सात दीस 33 ते 35 अंश तापमान उरतलें. हे संबंदी राज्य आपत्ती वेवस्थापन प्राधिकरणान हालींच ‘उश्णताय ल्हारां आड प्रतिबंधात्मक उपाय’ नांवाची भौशीक अधिसुचोवणी जारी केल्या.
दृश्टी मरीन आनी राज्य प्राधिकरणांनी वर्सुकी गिमाळी सुटये खातीर कुटुंबां सयत गोंयांत येवपी देशी पर्यटकांक हे सल्ले दिल्यात. सद्याची दर्याची परिस्थिती पळयल्यार तांबडो आनी हळडुव्या रंगांनी चिन्न केल्ल्या ध्वजां मदीं पेंवपाचो सल्ला दितात, हळडुवो ध्वज मध्यम दर्याचो प्रवाह दाखयता जाल्यार तांबडो ध्वज पेंवपा खातीर असुरक्षित वाठार दाखयता.
उश्णताये पासून स्वताची राखण करपाक आनी दर्यांत हायड्रेटेड रावपाक उदक पियेवप म्हत्वाचें. उश्णतायेच्या ल्हारां पासून स्वताची राखण करपाक सत्री वापरप म्हत्वाचें. सुर्याचो त्रास आनी उश्णतायेचो आघात जावचो न्हय म्हूण सनस्क्रीन घेवन वचप फायद्याचें. उश्णतायेच्या ल्हारांक लागून निळसर दर्या पेंवपाक आकर्शित करता, जाल्यार सगळ्यांनी रिप प्रवाह आनी दर्याची पातळी पळोवन दर्यांत देंवपाची खात्री करची. पर्यटकांच्या सुरक्षे खातीर हे संस्थेन राज्यभर 450 लायफगार्ड तैनात केल्यात.
“उश्णतायेक लागून कातीचेर फोड येवप, सनबर्न आनी उश्णतायेचो आघात जावंक शकता. दीसभर हायड्रेटेड रावपाची खात्री करची, कारण दनपारां सुर्याचीं किरणां चड आसतात आनी दनपारां दर्यांत वचप टाळचें अशें दृष्टि मरीनचे सीईओ नवीन अवस्थी हांणी सांगलां.
‘गोंयभर 35 लायफगार्ड टॉवर आसात. खंयचीय दुखापत जाल्यार दर्यावेळेर वचप्यांनी लायफगार्डा कडेन मदती खातीर वचप बरें, कारण दर एका लायफगार्ड टॉवरांत पयली मदत किट आसता अशें अवस्थीन सांगलें.
दर दिसा सकाळीं लायफगार्ड दर्याचे प्रवाह, वाऱ्याचे बदल आनी उदकापोंदा जावपी क्रियाकलापांचे नकाशे तयार करून सुरक्षीत जलतरण वाठार वळखतात आनी तांबड्या आनी हळडुव्या ध्वजांनी चिन्न करतात. तांबडे ध्वज उदकापोंदा पातळी चड आशिल्ल्या वा चड रिप प्रवाह जावपाचो धोको आशिल्ल्या वाठारांक चिन्न दितात, हे तांबडे ध्वज असुरक्षित पेंवपाचे वाठार दाखयतात.
उश्णतायेच्या ल्हारां पसून वाटावपाच्यो कांय टिप्स
० दर्यादेगेर आसतना तांबड्या आनी हळडुव्या ध्वजांनी बरयल्ल्या म्हायतीचो आदर करप आनी याद दवरप म्हत्वाचें, तांबड्या ध्वजांनी चिन्न केल्ल्या असुरक्षित वाठारांनी पेंवप टाळप.
० शक्य तितले लायफगार्डां लागसार पेंवचें, आतां मेरेन दक्षीण गोंयांतल्यो 22 दर्यादेगो आनी उत्तर गोंयांतल्यो 17 दर्यादेगो लायफगार्डांच्या देखरेखी खाला आसात. तशेंच मयें तळें आनी दुदसागर धबधब्याचेर लायफगार्ड तैनात आसात.
० दनपारां 3 ते 6 वरां मजगतीं लायफगार्ड ड्युटीचेर आसतना दर्यादेगेर भेट दिवप बरें.
० निर्जलीकरण, सनबर्न आनी उश्णतायेक आडावपा खातीर तोपी, सत्री, सनस्क्रीन आनी उदकाची बाटली घेवन वच्चें
भरपूर उदक पियेवन स्वताक हायड्रेटेड दवरात.
० भुरगें शेणलें जाल्यार भियेंव नाकात. लायफगार्डाक रोखडेंच सावध करचें.
० केन्नाच एकटें पेंवचो न्हय. संकश्टांत पडल्यार हात हवेंत करून मदती खातीर बोवाळ करात.
० दर्यादेगेवेल्या मुखेल प्रवेशदाराचेर मेळपी सुरक्षेचीं चिन्नां सदांच वाचात आनी पाळात.
० तुमी प्रशिक्षीत लायफगार्ड न्हय जाल्यार तुमकां संकश्टांत दिसपी कोणाकूय सोडवपाचो यत्न करचो न्हय. ताचे बदला लागींच्या लायफगार्डाक संपर्क सादचो वा मदती खातीर लायफगार्ड टाॅवरा कडेन वच्चें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
