भांगरभूंय | प्रतिनिधी
नवी दिल्ली, खबरां संस्था ः फाटल्या चार वर्सांत पयलेच खेपे भारतांत युनिकॉर्न कंपनींचो आंकडो उणो जाला. हुरून ग्लोबल युनिकॉर्न इंडेक्स 2024 प्रमाण भारतांतल्या युनिकॉर्न कंपनींचो आंकडो 2024 वर्सा 67 मेरेन उणो जावपाची शक्यताय आसा. 2022 आनी 2023 वर्सा भारतांत 68 युनिकॉर्न कंपनी आशिल्ल्यो.
2017 उपरांत पयलेच खेपे युनिकॉर्नांचो आंकडो उणो जाला. पूण भारताचे तुळेंत हेर देशांतल्या युनिकॉर्नांची संख्या चड उणी जाल्या. $1 अब्ज (8,300 कोटी रुपया) वा ताचे परस चड मोलाच्या स्टार्टअपांक युनिकॉर्न म्हण्टात.
हुरुनान एड्यूटेक कंपनी बायजूक युनिकॉर्नाच्या वळेरेंतल्यान वगळल्या. एक वर्सा आदीं बायजूचें मोल $22 बिलियन परस चड आशिल्लें, पूण सध्या ताचें मोल $1 बिलियन परस उणें जालां. बायजूचें मोल देंवप हें संवसारांतल्या खंयच्याय स्टार्टअपांतलो सगळ्यांत व्हडलो उणाव.
अमेरिकेंत युनिकॉर्नाची संख्या सगळ्यांत चड, भारत तिसरें क्रमांकाचेर
इंडेक्स प्रमाण अमेरिका 703 युनिकॉर्न सयत पयल्या क्रमांकाचेर जाल्यार चीन 240 युनिकॉर्न सयत दुसरे क्रमांकाचेर आसा. संख्येचे नदरेन भारत संवसारांत तिसरे क्रमांकाचेर आसा. ह्या निर्देशांकांत 2000 च्या दशकांत स्थापन जाल्ल्या नॉन-लिस्टेड कंपन्याचो (युनिकॉर्न) आस्पाव आसा.
भारतीयांनी देशां भायर 109 युनिकॉर्न सुरु केले
हुरुन इंडियाचे मुखेल संशोधक अनस रहमान जुनैद म्हणटा, 1,453 युनिकॉर्नांच्या वळेरेंतल्या भारतीय युनिकॉर्नांचो आंकडो उणो जावपाक कारण इक्विटी निर्देशांकांचेर फायदो जालो तरी स्टार्टअपांत गुंतवणूक जावंक नाशिल्ल्यान. तशेंच देशा भायर कंपनी स्थापन करपाच्या प्रवृत्तीक लागून भारताच्या संभाव्यतेकय लुकसाण जाला. भारतांतल्या संस्थापकांनी देशां भयर 109 युनिकॉर्न सुरू केल्ले, जाल्यार देशांत 67 युनिकॉर्न सुरू केल्ले.
बायट डान्स हो संवसारांतलो सगळ्यांत उंचेलो युनिकॉर्न
जागतीक युनिकॉर्न वळेरेंत पयल्या क्रमांकाचेर टिकटोकची (TikTok) मूळ कंपनी बायटडान्स (ByteDance) आसा, जाचे मोल 220 अब्ज डॉलर म्हळ्यार सुमार 16.64 लाख कोटी रुपया आसा. ताचे उपरांत एलॉन मस्काचे SpaceX जें $180 अब्ज डॉलर मोलाचें आनी मायक्रोसॉफ्ट गुंतवणूक केल्लें स्टार्टअप ओपनएआय, जें $100 अब्ज डॉलर मोलाचें आसा.
स्विगी आनी ड्रीम 11 टॉप इंडियन युनिकॉर्न
फूड डिलिव्हरी प्लॅटफॉर्म स्विगी आनी काल्पनिक स्पोर्ट्स कंपनी ड्रीम 11 हें भारतांतले सगळ्यांत चड मोलाचे स्टार्टअप. दोगांयचे मेल 8 अब्ज डॉलर म्हळ्यार सुमार 66.57 हजार कोटी रुपया आसा. ताचे उपरांत Razorpay आसा जाचे मोल 7.5 अब्ज डॉलर म्हळ्यार सुमार 62.41 हजार कोटी रुपया आसा. संवसारीक पांवड्यार स्विगी आनी ड्रीम11 83वे सुवातेर आसात जाल्यार Razorpay 94वे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
