भांगरभूंय | प्रतिनिधी
मंत्री गोविंद गावडे हांचो एसटी फुडाऱ्यांक सल्लो
भांगरभूंय । प्रतिनिधी
पणजी : जर एसटी समाजांतल्या फुडाऱ्यांक लोकसभा वेचणुकेंक उबें रावचें आसा तर तांणी उबें रावचें. लोकशायेंत तांकां तो हक्क आसा. पुण ते जिखपा खातीर उबे रावतले काय कोणांक उडोवपा खातीर उबे रावतले हाचेर मात्सो योग्य तो निर्णय घेवचो, असो सल्लो कला, संस्कृती मंत्री गोविंद गावडे हांणी दिला. राजकी आरक्षणा संदर्भात निर्णय जाल्लो आसतना वेंचणुके वेळार संघटनेंत फुट पडप बरोबर न्हय, असो हुस्को गावडे हांणी उक्तायला.
मिशन फोर पोलिटकल रिजर्वशन ह्या गटांत फुट पडल्या आनी रुपेश वेळीप हांच्या फुडारपणा खाला एक वेगळो गट तयार जाला. सरकारान एसटी आरक्षणाचेर आमकां फटयलां देखून सिविल सोसायटी ओफ गोवा ह्या बॅनरा खाला लोकसभा वेंचणूक लढोवपाचो विचार तांणी चलयला. हाचेर मंत्री गावडे उलयताले.
कितलीशींच वर्सां जे आदिवासी समाजांक आरक्षण मेळुंकना. तें मेळचें म्हूण अशी आस्त प्रत्येक गोंयकार आनी एसटी समाजात जल्मांक आयल्लो मनीस दवरून आसा. त्यावेळाचे आदले तशेच आताचे फुडारी सगळ्यांनी हे खातीर यत्न केल्यात. जेन्ना वेंचणुकेचे दीस लागीं पावतात तेन्ना खंयतरी फुट घालप हे बरोबर न्हय, अशे गावडे म्हणटात.
हावें खुपशो वेचणुको लढयल्यात. तातुंतल्यो एक पसून वेंचणूक ह्या लोकांनी पळोवंकना. आरक्षणा बाबत देशाचे गृह मंत्री, आदिवासी कल्याण मंत्री आनी हेरांक मेळून हो विशय सुटावो करपाक सरकारान बरेच यत्न केल्यात. आयल्या गेल्ल्या सरकारांनी खुपशी आश्वासनां दिल्ली आसत. पुण आमी ठाम आसात. हो विशय ओडून धरिल्ले आसतना ह्या फुडाऱ्यांचे वेंचणूक लढोवपा फाटल्या हेत कितें आसतलो असो म्हाका प्रश्न पडला, असे गावडे हांणी सांगलें.
वेंचणूक लढोवन कोणांक उडोवपा खातीर जर तुमी यत्न करता आसत जाल्यार तें करचे न्हय. जर तुमी जिखपा खातीर उबे रावतात जाल्यार तुमी खऱ्यांनीच फुडें सरचें. कोण तर तुमका फुलयता म्हूण तुमी वेंचणुकेंक उबे रावतात जाल्यार तुमचो निर्णय योग्य न्हय, असो सल्लो गावडे हांणी दिला.
हे चळवळींत नाशिल्ले
राजकी आरक्षणांक लागून लोक जे रस्त्यार येतात तातुंले दोग जाण जर सोडले जाल्यार एकंदरीत चळवळींत कोण नाशिल्ले. तरी लेगीत ह्या संदर्भात कोणीतरी फुडाकार घेवन एकलो तरी फुडारी तयार जावपाक जाय, ह्याय मताचो हांव आसा. पुण एकादी गजाल हातांत घेतना ते धसास लायतले आसत तेन्ना ताचे विपरीत परिणाम कोणाचेर जावचे नात हाची जतनाय घेवप गरजेचें. वेंचणुकेच्या वेळाचेर संघटनेतल्या फुटप हो चुकीचो संदेश.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
