भांगरभूंय | प्रतिनिधी
बंगळुरू, खबरां संस्था ः हांगाचे 29 वर्सां पिरायेचे वकील बायलेची अर्थीक आनी शारिरीक फटवणूक केल्ल्याचो धक्कादायक प्रकार घडला. आरोपीन स्कायपाचेर (Skype) वट्ट 36 वरां बायले कडेन व्हिडियो कॉला वरवीं भाश्य केले. तांतूत अमली पदार्थ चांचणेच्या नांवान हे बायलेचो नग्न व्हिडियोय रेकॉर्ड केल्ल्याचें उजवाडाक आयलां. उल्लेख केल्ल्या बायलेन पुलिशेंत केल्ले कागाळीक लागून ही सगळी घडणूक उजवाडाक आयली आनी पुलिसांनी आरोपींची चवकशी करपाक सुरू केल्या.
ऑनलायन फटवणूक कशी जाली?
3 एप्रीलाक दनपारां सुमार 2:15 वरांचेर पिडित बोयलेक एक फोन आयलो. मुखार आशिल्ल्या मनशान आपूण ‘फेडएक्स’ ह्या कुरियर कंपनींतल्यान उलयता अशें सांगलें. तुमच्या नांवान थायलंडाक वचपी पार्सलांत 140 ग्राम ड्रग्स मेळ्ळ्यात. उपरांत त्या मनशान फोन दुसऱ्या मनशा कडेन हस्तांतरीत केलो आनी ताणें मुंबय पुलीस अधिकारी आशिल्ल्याचें सांगलें. त्या मनशान पिडित बायलेक व्हिडियो कॉल करपा खातीर स्कायप सॉफ्टवेअर डावनलोड करपाक सांगलें. उपरांत सुरू जाल्लो व्हिडियो कॉल फुडले 36 वरां मेरेन चालू उरतलो हाची पिडित बायलेक कल्पना लेगीत नाशिल्ली.
बँक बॅलन्स आनी उत्पन्नाचीय चवकशी!
“तुमचो आधार नंबर मानवी तस्करी आनी अमली पदार्थांच्या वेव्हारा खातीर वापरला” अशें मुखार आशिल्ल्या मनशान सांगलें आनी फोन अभिषेक चौहान अशी वळख सांगपी मनशा कडेन दिलो. ह्या मनशान आपूण सीबीआय अधिकारी अशें सांगलें. तशेंच पिडित बायलेचो बँक बॅलन्स आनी उत्पन्न हांचे विशीं ताणें चवकशी केली. तशेंच, हें प्रकरण संवेदनशील आसा अशें सांगून पुलिसां सयत हेरांक हाची म्हायती दिवची ना असो सोपूत बायलेक घेवपाक लायलो.
बायलेचें खातें आशिल्ल्या बँकेचो एक कर्मचारी खातेंधारकांचे खातें अर्थीक गैरवेवार करपा खातीर वापरता अशें त्या मनशान स्कायप कॉलाचेर बायलेक सांगलें. हाचे उपरांत ताणें पिडित बायलेक कॅमेरो चालू दवरपाक सांगलें. तशेंच न्हिदिल्ल्या वेळार लेगीत हो कॅमेरो चालू दवरपाची शिटकावणी तांणी दिली.
दुसऱ्या दिसा केली पयशांची मागणी
मजगतीं, दुसऱ्या दिसा 4 एप्रीलाक चौहान हांणे पिडित बायलेक आपल्या खात्यांतले सगळे पयशे दुसऱ्या खात्यांत वेव्हारा विशीं म्हायती मेळोवपाक हस्तांतरीत करपाक सांगलें. ते प्रमाण बायलेन 10 लाख 70 हजार हस्तांतरीत केले. उपरांत तिका फुडले सुचोवणे मेरेन कुडींतल्यान भायर सरपाचे ना अशें सांगलें. उपरांत ताणें बायलेच्या क्रेडीट कार्डाचो वापर करून वट्ट 4 लाखांचे दोन वेव्हार केले.
कॉलांचेरुच बायलेचो नग्न व्हिडियो रेकॉर्ड केलो
हाचे उपरांत 4 एप्रीलाचे रातीं चौहान हांणे स्कायप कॅमेरो चालू आसतनाच बायलेक नार्कोटिक्स चांचणेच्या नांवान नग्न जावपाक सांगलें. सांगता तशें करूंक ना जाल्यार आमी तुमकां आनी तुमच्या कुटुंबाक अटक करतले. तुमका जिवेशी मारतलें अशी धमकी ताणें दिली. हें सगळें जाले उपरांत चौहान हांणे दुसऱ्या दिसा दनपारां 3 वरां मेरेन पिडित बायले कडेन 10 लाख रुपया खंडणी मागली. पयशें दिवंक ना जाल्यार डार्क वेबचेर नग्न व्हिडियो विकतलो अशी धमकी ताणें त्या बायलेक दिली. इतले सगळें जाले उपरांत आपली फटवणूक जाता अशें पिडित बायलेक कळ्ळें तेन्ना तिणे भियेवन व्हिडियो कॉल बंद केलो. त्या वेळार 5 एप्रीला रातचीं 1:15 वरां जाल्ली. दुसऱ्या दिसा पिडित बायलेन पुलिशेंत वचून सगळी घडणूक सांगली. हे प्रकरणांत पुलिसांनी खंडणी आनी फटवणूकीचो गुन्यांव नोंद करुन आरोपींचो तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
