ब्रिटीशांक लागून भारताचें शिक्षण जालें उध्वस्त: स्वामी गोविंददेव गिरीजी महाराज

भांगरभूंय | प्रतिनिधी

‘छत्रपती शिवाजी महाराज कथा’चें उक्तावण

हरिद्वार, खबरां संस्था: ब्रिटीशां पयलीं आमच्या देशांत असो एकूय जिल्हो नाशिल्लो जातूंत गुरुकूल नाशिल्लें. 1818 आदीं भारतांतले 70 टक्के लोक उच्चशिक्षीत आशिल्ले. इंग्रजांनी आपलें शिक्षण धोरण आमच्या माथ्यार मारून भारताचें शिक्षण उध्वस्त केलें. भारताचो गौरवशाली इतिहास आनी भारतीय राज्यकर्त्यांचे पराक्रम अभ्यासक्रमांतल्यान काडले. महात्मा गांधीजींनी लंडनांत भाशण दितना सांगिल्लें कीं ‘तुमी म्हज्या देशाची शिक्षण पद्दत नश्ट केली’, अशी म्हायती स्वामी गोविंद देव गिरीजी महाराज हांणी दिली.
हरिद्वारांत स्वामी रामदेव हांच्या तिसाव्या संन्यास दिसा स्वामी गोविंददेव गिरीजी महाराज हांणी ‘छत्रपती शिवाजी महाराज कथा’चें उक्तावण योग भवन, पतंजली योगपीठ- 2 च्या सभाघरांत केलें. स्वामी रामदेव आनी आचार्य बाळकृष्ण हांणी सुरवेक माचयेक नमस्कार केलो. गोविंददेव गिरीजी महाराज हांकां तांणी कथा सुरू करपाची विनवणी केली. ह्या सुवाळ्यांत गिरीजी महाराज उलयताले.

भारतीय इतिहासांत भारतांतलो पयलो भांगराळो खीण म्हळ्यार शिवाजो महाराजांचो राज्याभिशेक आशिल्लो. तशेंच दुसरो भांगराळो खीण म्हळ्यार 22 जानेवारी 2024 तारखेक रामलल्लाच्या अभिशेकाचो खीण. दुर्दैवान आमी आमचो इतिहास, आमची संस्कृताय, आमची गिरेस्तकाय विसरल्यांत. आमची 200 वर्सां आदली संस्कृती, आमच्यो परंपरा, शाश्‍वत ज्ञानाचो प्रवाह, आमचो सद्गुणांचो प्रवाह विसरून आमी गुलामगिरींत जगतात. सनातनाच्या मुल्यांचेर आनी आदर्शांचेर आक्रमण जाता तेन्ना हिंदुत्वाची गरज आसता. त्या हिंदुत्वाचो जर कोण संस्थापक, उद्घोशक वा प्रवर्तक आसात जाल्यार ते म्हळ्यार छत्रपती शिवाजी महाराज. महाराजांनी 350 वर्सां आदीं आई भवानीची पुजा करून आपलें शाश्‍वत वैभव अबाधित दवरून राष्ट्रधर्माची पुजा करून हिंदू साम्राजाची स्थापना केल्ली.

स्वामी रामदेव हांणी म्हणलें, छत्रपती शिवाजी महाराजांच्या चरित्रांतल्यान प्रेरणा घेवन अखंड भारताची प्रतिश्ठा फुडें व्हरपाक जाय, हो हे कथेचो उद्देश. मत, पंथ, जाती, संप्रदायाच्या नांवाचेर वांटून गेल्ल्या भारताक एकचार, अखंडताय मेळोवन दिवपाक जाय. ताचेच वांगडा पाकिस्तान, अफगाणिस्तान, इंडोनेशिया, मलेशिया, कंबोडिया, अक्साय चीन मेरेन भारताचें साम्राज्य पातळिल्लें, त्या भारताक परत कसो जोडपाक मेळटलो, हो संकल्प जागृत करपाक जाय. आमची संस्कृताय 1 अब्ज 96 कोटी 8 लाख 53 हजार 122 वर्सां पोरणी आसा. तिचे विशीं आमी अभिमान बाळगूंक जाय.
ह्या वेळार पतंजली योगपीठ, पतंजली विद्यापीठ, आचार्यकुलम, पतंजली आयुर्वेद महाविद्यालय, पतंजली गुरुकुलम, पतंजली रिसर्च फावंकेशन, पतंजली कन्या गुरुकुलम, वैदीक गुरुकुलम आनी हेरां कडेन संबंदीत आशिल्ल्या सगळ्या विभागांचे मुखेली,अधिकारी, शिक्षक, विद्यार्थी हाजीर आशिल्ले.