सामोसांत कंडोम, गुटखा आनी फातर, पुण्यांतली घडणूक
भांगरभूंय | प्रतिनिधी
पुणे, खबरां संस्था ः पुण्यांतल्या चिखली वाठारांतल्या एका ऑटोमोबायल कंपनीच्या कॅन्टीनांत गिरायकां खातीर तयार केल्ल्या सामोसांत कंडोम, गुटखा आनी फातर मेळपाचें धक्कादायक प्रकरण उजवाडाक आयलां. हे प्रकरणांत संबंदीत कॅटरिंग सेवा पुरवणदार कंपनीच्या संचालकान केल्ले कागाळी उपरांत गुन्यांव नोंद करुन पिंपरी-चिंचवाड पुलिसांनी फुडली चवकशी सुरू केल्या.
नेमके कितें घडलें?
पुलिसांनी दिल्ले म्हायती प्रमाण, दोन सप्तकां आदीं चिखालींतल्या एका व्हडल्या ऑटोमोबायल कंपनीच्या कॅन्टीनांतल्या सामोसांत कंडोम, गुटखा आनी फातर मेळ्ळे. हे संबंदी कॅटरिंग कंपनीन पुलिशेंत कागाळ केल्या.
हो सगळो वेवसायीक दुस्मानकायेचो प्रकार अशें पुलिसांच्या चवकशेंतल्यान स्पश्ट जालां. कंपनीच्या कॅन्टीनाचो कंत्राट एके कॅटरिंग कंपनीक दिल्लो. ते कंपनीन ताचो उपकंत्राट एका थळाव्या वेवसायिकाक दिलो. पूण कांय दिसां आदीं सामोसांत वापरिल्ली बँडेज पट्टी मेळ्ळी. ते उपरांत ह्या वेवसायिकाचो उपकंत्राट रद्द करून तो दुसऱ्या वेवसायीकाक दिलो.
पूण आदल्या वेवसायिकांन मनांत राग धरुन आपल्या दोन मनशांक नव्या वेवसायीका कडेन काम करपाक धाडले. हांतूत ताचो वेवसाय बंद करपाचो कट आशिल्लो. नव्या वेवसायिकाचो उपकंत्राट रद्द जावचो म्हणून तांणी कंडोम, गुटखा आनी फातर सामोसांत घाल्ले अशें चवकशेंतल्यान स्पश्ट जालां. पुलिसांनी एका दुबाविताक अटक केल्या. पुलिसांनी वट्ट पांच जाणांचेर गुन्यांव नोंद केला. तातूंत आदल्या वेवसायिका कडल्यान धाडिल्ल्यो 3 व्यक्ती आनी नव्यान उपकंत्राट दिल्ले वेवसायिका कडेन धाडिल्या 2 व्यक्तींचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
