भांगरभूंय | प्रतिनिधी
गोंय तशें ल्हान राज्य, पूण राजकी मळार गोंयचें नांव ‘फामाद’ आसा. आतां तें सरकारां उडोवपी राजकारण्यां
खातीरय, पक्षांतरां करपी फुडाऱ्यां खातीरय, आपल्याच पक्षांतल्या मंत्र्यांनी केल्लो भ्रश्टाचार उक्ताडार घालपी राजाकारण्यां खातीरय आनी केंद्रीय पांवड्यार आपलें मोलादीक योगदान दिवपी खासदारां खातीरय फामाद आसा.
गोंयांत लोकसभेचे दोन आनी राज्यसभेचो एकूच खासदार. आतां मेरेन लोकसभे खातीर 18 फुडारी वेंचून आयले आनी तांणी आपल्याक ‘जमता’ तितलें योगदान दिलें. ‘जमता’ तितलें इतलेच खातीर म्हणटा की जो चड हुशार आनी गिन्यानी आसता तोच बरे तरेन आपल्या राज्याचे प्रस्न मांडूंक शकता आनी विधेयकां तयार करतना आपलीं मतां दिवंक शकता. जाका शिक्षण कमी आसता आनी फकत पक्षाच्या खुस्तार जिखून आयिल्लो आसता, तो फकत संसदेंत आपली हजेरी लावपा बगर कांयच करपाक शकना. राजकारण हें एकूच अशें मळ आसा जंय खंयच्याच मळाचो अणभव नासतना, खंयच्याय खात्यांचो मंत्री जावंक शकता. ताका त्या वेळार शिक्षण बी कोणूच विचारिना.
दक्षीण गोंयचे आदले खासदार अॅड. नरेंद्र सावयकार हे हुशार फुडारी. तांच्या स्पश्ट आवाजांतल्यान ते कितें उलयतात हें सहजतायेन लोकांच्या कानां मेरेन पावता. तशेंच कायद्याचें गिन्यान आशिल्ल्यान ते आपल्या कामाक न्याय दिवपाक शकतात, पूण हे खेपे तांकां भाजपान तिकेट दिली ना. तांच्या पक्षाच्या निर्णयांत आमकां पडपाचो अधिकार ना, पूण एक हुशार मनशाक राज्य आनी देशा खातीर योग्य योगदान दिवपा पासून वंचीत केलो इतलेंच एक मतदार ह्या नात्यान म्हणूं येता. आतां वकिलूच आमदार वा खासदार जावचे अशें म्हणना, पूण कायद्याचें गिन्यान आसपी व्यक्ती कायदो तयार करतात ते प्रक्रियेंत आसप गरजेचें. हेरांक हे प्रक्रियेंत आस्पावीत केल्यार ताचो कांयच फायदो जायना.
गोंयांत आज मेरेन जे 18 खासदार जाले, तातूंतल्या तिगा जाणांक केंद्रांत मंत्री जावपाचो मान मेळ्ळो. हातूंत काँग्रेसचे फुडारी एदुआर्द फालेरो, मगोचे आदले वांगडी आनी आतांचे काँग्रेस फुडारी अॅड. रमाकांत खलप आनी फाटले पांच फावट भाजपाच्या तिकेटीचेर उत्तरेच्यान जिखून येवपी श्रीपाद नायक हांचो आसपाव आसा.
मनोहर पर्रीकार हे लेगीत केंद्रीय मंत्रिमंडळांत पावले आनी देशाचे संरक्षण मंत्री जाले. मात ते गोंयच्यान निवडून येवंक नशिल्ले. तांकां उत्तर प्रदेशांतल्यान राज्यसभा खासदार म्हूण वेंचून दिल्लींत व्हेल्ले. आमचें इल्लेशें गोंय. पूण राजकी मळार व्हड व्हड पदां मेळ्ळीं. हातूंत रमाकांत खलप आनी एदुआर्द फालेरो हांकां मंत्रीपदाचो कमी काळ मेळ्ळो. पूण तांणी आपलें नांव दवरलें. तांणी देशाच्या आनी राज्याच्या फायद्या खातीर काम केलें.
आदले कायदो मंत्री अॅड. रमाकांत खलप हांणी आपल्या 18 म्हयन्यांच्या कार्यकाळांत कांय वेंचीक कायदे तयार केले आनी महिला आरक्षणा खातीर पावल मारलें आनी विधेयक मांडलें. आयज परत एक फावट ते उत्तर गोंयच्यान लोकसभेची वेंचणूक लढयतात. भाजपाचे उत्तर गोंयचे उमेदवार परत एक फावट श्रीपाद नायक आशिल्ल्यान दोगाय ज्येश्ट फुडाऱ्यां मदीं ही राजकी लढाय जातली.
श्रीपाद नायक हें गोंयच्या राजकी मळार एक व्हड नांव. गोंयांत भाजपाचें कार्य वाडोवपाक तांचो आनी तांचे इश्ट अॅड. मनोहर आडपयकार हांचो मोलाचो वांटो आसा. पूण श्रीपाद नायक हांकां, तांचें नांव मुख्यमंत्री पदा खातीर मुखार येवन लेगीत आनी भंडारी समाजाची लोकसंख्या चड आसून लेगीत, संद मेळ्ळी ना. घडये तांकां असले विशय ‘ताणून’ धरपाक कळना. ते खातीर तांच्या आनी तांच्या मवाळ सभावा खातीर लोक तांकां भाऊ म्हणटात आसुंये. फाटलीं पंचवीस वर्सां ते खासदार म्हूण आसात, मात तांच्या कार्याचेर विरोधक बोटूय दवरतात. तांणी जाय तितली उदरगत केलीना असो आरोप तांचेर जाता. पूण अशे आरोपय तांचेर ‘आदरान’ करतना कांय फुडारी दिसतात.
श्रीपाद नायक हे अटलबिहारी वाजपेयी हांच्या सरकारांत शेतकी मंत्री, नागरी उड्डाण आनी महामार्ग मंत्रीय जाले. उपरांत 2014 वर्सा मोदी सरकारांत तांकां आयुष मंत्रालयाचो स्वतंत्र ताबो मेळ्ळो आनी हेर खातींय मेळ्ळीं. उपरांत 2019 वर्सा परत एक फावट मोदी सरकारांत ते मंत्री जाले आनी विंगड विंगड खातीं तांकां मेळ्ळीं. पूण श्रीपाद नायक ‘शायन’ जावंक शकले नात. तांचे कडेन शिक्षण आशिल्लें आनी ते खेळगडेय. तरीय तांकां राजकारण्यांक जी ‘प्रसिद्धीं’त रावपाची गरज आसता, ती बाजू जमली ना अशें म्हणल्यार अतिताय जावची ना. तांचे विशीं लोक उलयतना आदरान उलयतात, घडये इतलेच खातीर की तांचें नांव हेर राजकारण्यां भशेन भ्रश्टाचारांत घुस्पल्लें ना आनी तांकां सत्तेचो ‘मद’ मारिल्लो ना. तांणी घडये राजकी सूड घेवपा खातीर कोणाची बदलीय केलीना आनी कोणाच्या घराचेर बुलडोजरूय चडयलो ना. हे खातीर तांकां लोक आजून मेरेन आदरान ‘भाऊ’ म्हुणटात. पूण भाऊचे हे गूण आतांच्या राजकारणांत चलतात? घडये नात!!
श्रीपाद नायक हांच्यो फाटल्यो पांच वेंचणुको पळयल्यो जाल्यार तांचो मतांचो आंकडो वाडत आसा. एक लाख मेरेन मायज मतां घेवन ते जिखून आयल्यात. हाचे वयल्यान लोक तांकां कितले मानतात हें कळटा. पूण राजकारणांत परिस्थिती सदांच तशीच उरना, हें तांकांय खबर आसतलें.
गोंयचे तिसरे फुडारी, जांणी राष्ट्रीय मळार नांव जोडलें ते काँग्रेसीचे फुडारी एदुआर्द फालेरो. चार फावटी कुडटरी मतदारसंघांतल्यान जिखून येवन उपरांत खासदारूय जावपी फालेरो हांणी केंद्रांत मंत्री जातकच खूब बरें काम केलां. गोंय मुक्ती आदीं गोंयच्या लोकांचें भांगर पुर्तुगेज बँकांनी आशिल्लें, तें परत गोंयांत हाडपाक तांणी गोंयकारांक मदत केली. आपूण खासदार हो आपल्या मतदारसंघाचो हें ते मंत्री जातकच विसरले नात. तांणी आपल्या पदाक न्याय दिलोच त्याच बराबर गोंयकारांकूय न्याय दिलो. राजीव गांधी प्रधानमंत्री आशिल्ले तेन्ना फालेरोबाब हे विदेश वेव्हार मंत्री आशिल्ले. हाचोच फायदो तांणी लोकांक करून दिलो आनी देशा खातीर योगदान दितना आपलें गिन्यान आनी हुशारकायेचो वापर केलो. अशे गिन्यानी आनी हुशार व्यक्ती ‘दिल्लींत’ पावपाची गरज आसा. जे गोंयकारांक अभिमान मेळोवन दितले… भ्रश्टाचार करपी न्हयच न्हय…
(लेखक आयएएनएस ह्या राष्ट्रीय खबरां संस्थेचे गोंयचे मुखेल प्रतिनिधी आसात.)
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
