भांगरभूंय | प्रतिनिधी
भांगरभूंय । प्रतिनिधी
वास्कोः काँग्रेस पक्षान अनुसूचीत जमाती (एसटी) आनी हेर समाजांचो फकत राजकी फायद्या खातीर उपेग करून घेतिल्ल्यान हे समाज सगल्या मळार फाटीं पडल्यात असो आरोप करून गोंयांत अनुसूचीत जमातींच्या राजकी आरक्षणा खातीर भाजपाप फुडाकार घेतला. फुडाराक गोंयांतल्या जायत्या मळार एसटी जमांतीतले लोक आघाडेर आसतले, अशें मुख्यमंत्री डॉ प्रमोद सावंत हांणी सांगलें.
दाबोळी भाजपा मंडळा वतीन नवेंवाडें हांगा आयोजीत केल्ले भौशीक सभेंत मुख्यमंत्री उलयताले. ह्या वेळार पंचायत मंत्री मॉविन गुदिन्हो, जिल्हा पंचायत वांगडी .अनिता थोरात, चिखलीचो सरपंच कमलाप्रसाद यादव, उपसरपंच ऐश्वर्या कोरगांवकार, चिकोलणा बोगमाळोचो सरपंच संकल्प महाले, दाबोळी भाजप गटाध्यक्ष संदीप सूद, मुरगांवचे नगरसेवक विनोद किनळेकार, नगरसेविका श्रध्दा महाले हाजीर आशिल्ली.
राज्य सरकाराच्या वेगवेगळ्या येवजण्यांची म्हायती दिल्या उपरांत डॉ. सावंत हांणी सांगलें की, केंद्रांतल्या भाजप सरकारन उज्वला येवजण, किसान येवजण, गरीब येवजण चालीक लावंन साबार लोकांक न्याय मेळोवन दिला. गोंयच्या दोनूय लोकसभा मतदारसंघांत भाजपाचे उमेदवार जैतिवंत जावंन केंद्रात म्हत्वाची काम करतले. भाजप व्हो साबार लोकांचो विचार करपी पक्ष आसा. काँग्रेसान केन्नाच लोकांच्या हिता खातीर फुडाकार घेतलो ना. ताका लागून लोकांचो त्या पक्षा वयलो विस्वास गेलो अशें मॉवीन गुदिन्हो हांणी सांगलें.
ह्या वेळार नगरसेवक सुदेश भोसले हांणी आपल्या समर्थकां वांगडा भाजपात प्रवेश करतगीर मुख्यमंत्र्यांनी ताका फुलां तुरे भेटोवन येवकार दिलो. सभेच्या सुरवेक संदीप सूद हाणे सगल्यांक येवकार दिलो . महेश नावेलकारान सूत्रसंचालन केलें आनी विनोद किनळेकारान निमणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
