भांगरभूंय | प्रतिनिधी
भांगरभूंय । प्रतिनिधी
वाळपयः अर्थीक नदरेन कमकुवत आशिल्ल्या घराब्यांतल्या भुरग्यांक दर्जेदार शिक्षणाची सुविधा मेळची हे खातीर केंद्र सरकारान दक्षीण गोंयांत काणकोण आनी उत्तर गोंयांत वाळपय हांगा जवाहर नवोदय ही निवासी विद्यालयां सुरू केलीं. मात फटीचीं कागदपत्रां तयार करून वाळपयच्या नवोदयांत सध्या महाराष्ट्रांतल्या 25 भुरग्यांक प्रवेश दिल्ल्याचें सामकार आयलां. विद्यालयांत प्रवेश मेळूं नाशिल्ल्या विद्यार्थ्यांच्या पालकांनी सत्तरीच्या मामेलदाराक एक निवेदन सादर करून ह्या प्रवेश प्रकरणाची चवकशी करपाची मागणी केल्या.
ह्या विद्यालयांत पांचवी वर्गान नव्या विद्यार्थ्यांक प्रवेश दितात. ते खातीर प्रवेश परिक्षा दिवची पडटा. हे परिक्षेंत पास जाल्ल्या विद्यार्थ्यांक गुणवत्ते प्रमाण विद्यालयांत प्रवेश दितात. हे प्रवेश परिक्षेचो निकाल हालींच जाहीर केलो तेन्ना महाराष्ट्रांतल्या भुरग्यांक प्रवेश दिल्ल्याचें उक्ताडार आयलें. उत्तर गोंयांतल्या भुरग्यांक प्रवेश दिवपाचें सोडून महाराष्ट्रांतल्या भुरग्यांक कसो प्रवेश मेळ्ळो, हाची चवकशी प्रवेश मेळूं नाशिल्ल्या विद्यार्थ्यांच्या पालकांनी केली तेन्ना फट कागदपत्रां सादर करून ह्या भुरग्यांक प्रवेश दिल्ल्याचें सामकार आयलें.
व्हिडिओ जालो व्हायरल
सत्तरी तालुक्यांतली एक व्यक्ती फट कागदपत्रां तयार करून नवोदय विद्यालय प्रवेश परीक्षे खातीरचे सोपस्कार पुराय करपाक मजत करता अशें दाखोवपी एक व्हिडिओ व्हायरल जालो. ही व्यक्ती दरेका भुरग्या फाटल्यान 40 हजार रुपये घेता आनी ताचे वरवीं भुरग्यांक प्रवेश मेळटा हे सामकार आयलें. पालकांनी व्हो व्हिडिओ थळाव्या पत्रकारांक दाखयलो. विद्यालयाच्या कांय पालकांनी सत्तरीचो उपजिल्होधिकारी नीलेश धायमोडकार हाका एक निवेदन सादर करून उत्तर गोंयांतल्या विद्यार्थ्यांचेर जाल्ल्या अन्यायाची चवकशी करपाची मागणी केली.
फट कागदपत्रां तयार करून विद्यार्थ्यांक प्रवेश मेळोवन दिवपाच्या ह्या रॅकेटाची चवकशी करून दोशी आशिल्ल्यांचेर कारवाय करपाची मागणी सागर सावंत आनी ज्ञानेश्वर गावडे ह्या पालकांनी केल्या. व्हायरल जाल्ल्या व्हिडिओ वरवीं विद्यालयांतले कांय शिक्षक आनी कर्मचारी तशेंच नवोदय विद्यालयाच्या प्राचार्याचो संबंद आशिल्ल्याचें स्पश्ट जालां. ताचो सोद उपजिल्होधिकाऱ्यान घेवचो अशें पालकांनी सांगलां. महाराष्ट्रांतल्या ज्या विद्यार्थ्यांक नवोदय विद्यालयांत पांचवे यत्तेंत प्रवेश दिलो तो रद्द करून गोयांतल्या पात्र विद्यार्थ्यांक प्रवेश दिवपाची मागणी पालकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
