भांगरभूंय | प्रतिनिधी
पणजी, प्रतिनिधी : अंदूं भारतांत सरासरी ९६ ते १०५ टक्के मान्सून असण्याची शक्यताय आशिल्ल्याचें स्कायमेट हे खाजगी हवामान संस्थेन पत्रकांत जारी केलां. तशेंच अंदूंचो मान्सून सामान्य आसतलो असो अदमास उक्तायला.
ह्यान पयलीं एशिया पॅसिफीक इकॉनोमीक कॉर्पोरेशन क्लायमेट सेंटर (एपीसीसी) हे संस्थेन मान्सून सरासरी परस चड आशिल्ल्याची शक्यताय उक्तायल्ली. भारतीय हवामान खात्यान जारी केल्लो मान्सूनचो अधिकृत अदमास फुडल्या एक ते दोन दिसांनी जारी जातलो.
भारतांत अंदूं सरासरी १०२ टक्के पावस पडपाक शकता. ९६ ते १०४ टक्क्यां मजगतींचो पावस टक्क्यां मजगतींचो मान्सून हो सामान्य समजतात. पॅसिफीक महासागरांत एल निनो परिस्थिती उणी जावन ला निना परिस्थीत निर्माण जाता. ला निनांत पावस चड पडटा. अशें जरी आसलें तरी एल निनो तूनाक निना परिस्थीतींत वचपाच्या काळांत मान्सून सरासरी इतलोच आसता. ताका लागून अंदूं मान्सूनच्या सुरवातेक पावस उणो पडपाचो अदमास आसा. जुलया उपरांत मात देशांत सगळे कडेन बरो पावस पडपाचो अदमास आसा, अशें स्कायमेट संस्थेन आपल्या प्रसिद्धी पत्रकांत म्हणलां.
जून आनी जुलय मजगतीं देशाच्या उत्तर, दक्षीण आनी पश्चीम भागांत बरो पावस पडपाची शक्यताय आसा. महाराष्ट्र आनी मध्य प्रदेशांत समाधानी पावस पडपाची शक्यताय आसा. जाल्यार बिहार, झारखंड, ओडिशा, पश्चीम बंगालांत आनी ईशान्येच्या राज्यांत ह्या दोन म्हयन्यांत सरासरी परस उण्या पावसाची शक्यताय आसा. पुराय देशांत सरासरी परस चड पावस पडपाची शक्यताय १० टक्के आसा. सरासरी इतलो पावस पडपाची शक्यताय ४५ टक्के जाल्यार दुष्काळाची शक्यता १० टक्के आशिल्ल्याचें संस्थेन म्हणलां.
पणजे ३४.२ अंश तापमान
मजगतीं, मंगळारा पणजे ३४.२ अंश सेल्सिअस तापमानाची नोंद जाल्या.जाल्यार मुरगांवां तापमान ३४ अंश सेल्सिअस उरतलो. फुडले कांय दीस तापमान ३५ अंश सेल्सिअसा मेरेन पावपाची शक्यताय हवामान खात्यान उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
