भांगरभूंय | प्रतिनिधी
मडगांव, प्रतिनिधी : भाजपाची वायट नदर दक्षीण गोंयचेर आशिल्ल्यान पर्यावरण, रान आनी रानांतल्या जिवांची वाट लागल्या. भाजपाक दाबोळी विमानतळ बंद करपाचो आसा, गोंयच्यो जमनी घेवन विकपाच्यो आसात. ही हुकुमशाय सोंपोवन गोंयांक भाजपा पसून मुक्त करपाचो वेळ आयला अशें कॉंग्रेसीचे दक्षीण गोंयचे उमेदवार कॅ. विरियातो फर्नांडीस हांणी सांगलें.
दक्षीण गोंयचे इंडी आघाडीचे उमेदवार कॅ. फर्नांडीस आनी ऍड. रमाकांत खलप आनी हेर फुडार्यांनी लोकसभा वेंचणुकेच्या प्रचाराची सुरवात लोहिया मैदाना वयल्या हुतात्मा स्मारक आनी डॉ. राम मनोहर लोहिया हांच्या पुतळ्याक फुलांचो हार अर्पण करून केली. ह्या वेळार कॉंग्रेस प्रदेशाध्यक्ष अमित पाटकार, विरोधी पक्ष फुडारी युरी आलेमाव, आमदार एल्टन डिकॉस्टा आनी ऍड. कार्लोस फेरेरा, कॉंग्रेस कार्यकारी समितीचे आमंत्रीत वांगडी गिरीश चोडणकार, आपचे अध्यक्ष अमित पालेकार, आमदार व्हेंझी व्हिएगस आनी क्रुझ सिल्वा, राष्ट्रवादी कॉंग्रेसचे जुझे फिलीप डिसोझा, गोवा फॉरवर्डचे प्रशांत नायक, तृणमूल कॉंग्रेसीचे समील वळवयकार, शिवसेनेचे जितेश कामत, आदली मंत्री एलिना साल्ढाना, ऍड. प्रतिमा कुतिन्हो आनी हेर विवीध विरोधी पक्षांचे फुडारी, पदाधिकारी आनी कार्यकर्ते ह्या वेळार हाजीर आशिल्ले.
भाजप सरकाराक सत्ते वयल्यान कायमचें काडून लोकाभिमूख इंडिया सरकार स्थापन करपा खातीर आयच्यान क्रांती सुरू जाल्या. गोंय आमच्या दोनूय उमेदवारांक जैतिवंत करतलें असो विस्वास कॉंग्रेसीचे प्रदेशाध्यक्ष अमित पाटकार हांणी उक्तायलो.
ह्या वेळार हाजीर आशिल्ल्या हेर फुडार्यांनी आपापलीं मतां मांडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
