भांगरभूंय | प्रतिनिधी
मडगांव, प्रतिनिधी ः कुडचड्यार प्रचारा वेळार परवानो नासतना स्पीकर वापरिल्ल्यान ‘आप’चे आमदार व्हेंझी व्हिएगस हांका कारणां दाखोवपाची नोटीस धाडल्या. विरोधकांचो आवाज बंद करपाचो हो यत्न सुरु आशिल्ल्याचो आरोप आमदार व्हेंझी हांणी केलो.
मडगांव, बाणावली आनी हेर सुवातींनी कॉर्नर बसका घेतले उपरांत आप आमदार व्हेंझी हांणी 6 एप्रीलाक सांजवेळा सुमार 7 वरांचेर कुडचडे हांगा छत्रपती शिवाजी सर्कल लागसार इंडिया अलायन्स बरयल्ल्या बॅनरा सयत स्पीकर वरवीं बसकेक संबोधीत केलें. हे भौशीक बसके वेळार आप आमदार व्हेंझी हांणी लावडस्पीकर वापरपाची कसलीच परवानगी घेवंक ना अशी म्हायती भरारी पंगडान कुडचडेंतल्या सहाय्यक वेंचणूक अधिकाऱ्यांक दिली. तांणी हे संबंदी अहवाल जिल्लो वेंचणूक आयोगा कडेन सादर केलो. ते प्रमाण जिल्लो वेंचणूक अधिकारी अश्विन चंद्रू ए. (आयएएस) हांणी आप आमदार व्हेंझी व्हिएगस हांकां कारण दाखोवपाची नोटीस जारी केली. जिल्लो वेंचणूक आयोगान जारी केल्ले कारण दाखोवपाची नोटीसेक 48 वरां भितर जाप दिवची. नाजाल्यार तुमकां कांयच सांगपाचें ना अशें मानून फुडली कारवाय जातली अशेंय तांतूत नमूद केले.
मजगतीं, ही नोटीस मेळ्ळ्या उपरांत आप आमदार व्हेंझी हांणी प्रतिक्रिया दितना सांगलें, लोकसभा वेंचणुकेंत इंडि आघाडीचे दोनूय उमेदवार वेंचून येतले. हाचो भंय आतां सरकाराक दिसता देखून ते प्रचारात आडमेळीं हाडतात. विरोधकांचो आवाज बंद करपाचो हो एक प्रकार अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
