भांगरभूंय | प्रतिनिधी
ओंटारियो, खबरां संस्था ः गृहपाठ हो विद्यार्थ्याच्या शिक्षणाचो एक म्हत्वाचो भाग. हाचे वरवीं शिक्षक, विद्यार्थी आनी पालकांक जोडूंक मेळटात. पूण गृहपाठ कठीण आसल्यार तो विद्यार्थ्याक तशेंच पालकां मदीं एक समस्या जावंक शकता. ऑस्ट्रेलिया, कॅनडा विद्यापिठाच्या संशोधनांतल्यान गणिताच्या गृहपाठांतल्यान फायद्या परस चड लुकसान जाता असो निश्कर्श काडला. शाळेन दिल्लो गृहपाठ पालकांच्या मजतीन लेगीत विद्यार्थी योग्य रितीन पुराय करूंक शकनात आनी देखून ही गजाल दोगांय खातीर अस्वस्थ थारता. सादारणपणान भुरग्यांच्या गृहपाठाची जापसालदारकी आवयचेर आसता. मागीर गणित सोडवपाक शकले ना जाल्यार गणित हो बायलांचो विशय न्हय अशें नकारात्मक विचारांक प्रोत्साहन दिवपाची शक्यताय आसता.
खरें म्हणल्यार हेर विशयां प्रमाण गणित शिकपाची आनी शिकोवपाचे पध्दतीत बदल जालो. म्हणल्यार पालकांकडल्यान शिकून घेतिल्ल्या गणिताची पध्दत वेगळी आसूं येता. ऑस्ट्रेलिया विद्यापिठाची गणिताची प्राध्यापिका लिसा ओकीफ हांणी सांगलें, नवीन पध्दत समजून घेवप, ती शिकून घेवप, उपरांत भुरग्यांक गणित विशय समजून सांगप ही प्रक्रिया पालकांक कठीण आसूं येता. हाका लागून पालकांचेर गरजे भायर दबाव येवंक शकता. पिळग्यांनी नकारात्मकताय वचूंक शकता. हो अभ्यास ब्रिटीश जर्नल ऑफ सोशियोलॉजी ऑफ एज्युकेशनांत उजवाडाक आयला. ८ ते ९ वर्सां पिरायेच्या भुरग्यांनी आनी तांच्या पालकांनी हातूंत वांटो घेतिल्लो.
गरजे परस चड गृहपाठ केल्यार कुटुंबाच्या वेळाचेर वायट परिणाम जाता. दीसभर कामांत व्यस्त रावून कुटुंबा वांगडा वेळ सारतना गृहपाठ करपाचो वेळ जाल्यार कुटुंबा मदीं उदासीनताय येवपाक लागता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
