भांगरभूंय | प्रतिनिधी
संवसार पाडव्याच्या लागींचो म्हूर्त सादून काँग्रेस पक्षा वतीन निमणे दिल्लींतल्यान गोंयांतले लोकसभा वेंचणुके खातीर
आपले दोनूय उमेदवार जाहीर केले. तेन्ना गोंयांतल्या काँग्रेस फुडाऱ्यांनी ‘सुटले बाबा एकदाचे’ अशें म्हणले आसतलें. दिल्लींतल्यान उमेदवार जाहीर जायनात हें पळोवन आनी हांगाची गुंतागुंतीची परिस्थिती मतींत घेवन पक्ष श्रेश्ठींनी गोंयांत भारतीय जनता पक्षाक सरळ ‘वॉकओव्हर’ तर दिवपाचें थारायलें ना मू, असो दुबाव कांय फुडाऱ्यांच्या मनाक येवपा इतलें हें प्रकरण हाता भायर गेल्लें. लोकसभेच्या आपल्या उमेदवारांच्या चवदाव्या आनी पंदराव्या वळेरे मेरेन गोंयांतल्या फकत दोन सुवातांचो आसपाव जायना हाचें सगल्यांक अजाप दिसप सभावीक आशिल्लें, पूण गोंयांतल्या उरिल्ल्या सुरिल्ल्या इन मीन तीन काँग्रेस फुडाऱ्यांनी पक्षांतर्गत वातावरण इतलें दुशीत करून दवरलां की ह्या प्रदेशांल्यान आमकां एखादो खासदार मेळपाक शकता ही आस्त काँग्रेसीच्या केंद्रीय फुडाऱ्यांनी सोडून दिल्ली आनी ताचेर रायबरेली- अमेठी प्रमाण सामको निमाणे विचार करचो अशेंय जायत्या जाणाक दिशिल्ल्यान घडये गोंयांतल्या दोन उमेदवारांची निवड करतना अक्षम्य असो कळाव जाला आसुये. वास्तवीक उत्तर गोंयांतल्यान आदले केंद्रीय मंत्री खलप हांकां उमेदवारी दिवपाचें म्हयन्या पयलींच थारिल्लें. स्वता खलप हांणी म्हज्या सारक्या तांच्या लागींच्या इश्टां कडेन चर्चा करतना तशें म्हयनो सव्वा म्हयन्या पयलींच सांगिल्लें. पूण ती उमेदवारी जाहीर करपाक पस्तीस, चाळीस दीस लागले हाचे वयल्यान गोंय आनी दिल्लींत लेगीत काँग्रेस पक्षांत कितें चल्लां हाची कल्पना करूं येता.
खलप हांचे उमेदवारी विशीं खुद्द काँग्रेस पक्षांत लाख प्रश्न जायत्या जाणांनी उपस्थीत करून तांचे उमेदवारीची घोशणा चडांत चड पयसावपांत घडये येस मेळयलें आसत. उपरांत सामक्या निमण्या खिणाक ती जाहीर केल्ल्यान राजकी लाबा परस पदरांत चड लुकसाण पडपाची शक्यताय उप्रासल्या आनी कांय काँग्रेस फुडारी तें न्हयकारनात. म्हयनो- सवाय म्हयनो पयलींच खलप हांचें नांव उमेदवार म्हणून जाहीर जाल्लें जाल्यार वट्ट परिस्थितींत आयज खूब फरक पडटाशिल्लो, पूण काँग्रेस म्हणल्यार हें सगळें आयलेंच आनी आमचे रमाकांत खलप लेगीत तें मानून घेतात. खलप हांची लागीं- लागीं निश्चीत जाल्ली उमेदवारी आडावपा खातीर खुद्ध काँग्रेशींतल्यान तर यत्न जालेच, ताचे भायर ‘इंडी’ आघाडेंत घटक पक्ष आशिल्ल्या आम आदमी पक्षाच्या हांगच्या गिरेस्त फुडाऱ्यांनीय निमणे मेरेन आपले प्यादें फुडें हाडपाचे नेटान यत्न केले, पूण खलप हाचें नशीब म्हणून तांच्या नांवार निमणी म्होर बसली. आतां तांचो कस कसो लागला, ‘आप’ कडल्यान दिल्ल्या आस्वासनाक पाळो दिलो ना अशे जायते प्रस्न आयज चर्चेंत आसले तरी आपलो इश्ट सुनील कवठणकारा खातीर ‘आपा’च्या थळाव्या अध्यक्षान ते खातीर केल्ल्यो दिल्ली वारी मात अपेशीच थारल्यो आनी रमाकांत खलप हाचो घोडो निमणो मांडवींत न्हालो. वेंचणुकेची तारीख सामकी लागीं आयिल्ले कडेन रमाकांत खलप हांची जाहीर जाल्ली उमेदवारी म्हणल्यार प्रतिस्पर्धी उमेदवाराक फुडें दिल्ली चाल वा वॉकओव्हर आशिल्ल्यांचे जायत्या जाणांक दिसता, ते सामकें चुकीचें म्हणपाक जायना.
भाजपाच्या श्रीपाद नायक हांका जैताचो सको हुबोवपा पसून आडावपाक खलप हांका दोन आघाडेचेर लडचें पडटलें आनी दुर्दैव अशें कीं तांचे कडेन आतां ते खातीर जाय तितलो वेळ ना. एकाच काँग्रेस आमदाराचो आदार घेवन तांकां फुडें वच्चें पडटलें. पूण, तांचो प्रतिस्पर्धी उमेदवार पयलींच पांच- स मैल फुडें पावलां. पक्षाचे उमेदवारी खातीर बाशिंग बांदून बशिल्ल्या दोन थळाव्या फुडाऱ्यां कडल्यान तांचे पांय ओडपाचे यत्न जावचे नात, अशें ठामपणान कोणूय सांगपाक शकचो ना. अशे परिस्थितींत खलप हांची म्हयनो, सवाय म्हयनो पयलींच उमेदवारी जाहीर केल्ली जाल्यार तातूंतल्यान मार्ग काडपाक खलप हांचे कडेन भरपूर वेळ आसताशिल्लो. पूण तशें जालें ना आनी ताकाच लागून श्रीपाद नायक हांच्या मार्गांत काँग्रेस व्हडले आडमेळे करपाक शकतलो अशें दिसना.
उत्तर गोंयांत जें घडलां तें निश्चीत काँग्रेस फुडाऱ्यांक टाळपाक जातालें. पूण, द. गोंयांत लेगीत उमेदवार निवडी खातीर तांणी लायिल्लो कळाव भाजपाक फायद्याचो थारला. भाजपाचो उमेदवार जाहीर जाय मेरेन वाट पळोवपाची पयली घोडचूक काँग्रेसीन केली आनी भाजपान दिल्लो उमेदवार ताका पळोवन लटपटपाक लागिल्ले पांय थांब मेरेन पलल्वी धेंपो हिणें अर्दें अधीक गोंय पिंजून काडिल्लें. विरोधकांक अशी संद दिवप म्हणल्यार वॉकओव्हर दिवपा सारकें हें कळना हाका कितें म्हणपाचें? पल्लवी धेंपो हिका तितलेच ताकीचो उमेदवार दिवपाक उपरांत सोदासोद सुरू जाली आनी तातूंत आनीक एक पंद्रस गेली.
दक्षीण गोंयांत गिरीश चोडणकार हांचे सयत उण्यात उणे चार जाण उमेदवारी खातीर उत्सूक आशिल्ले तांची पल्लवी धेंपोन विकेट उडयली. गिरीश निमणे मेरेन राहुलजींच्या आशिर्वादान पीचीर तिगून रावले. पल्लवीचे तोडीचो उमेदवार मेळचो म्हणून जाहीर जाल्लो सोद प्रियंका वाड्रा गांधी हांचे मेरेन पावलो. कांय थळाव्या काँग्रेस फुडाऱ्यां मदीं उमेद आयली आनी दक्षीण गोंय हो काँग्रेसाचोच मतदारसंघ आशिल्ल्यान प्रियंका खातीर तो सुरक्षीत आसा आनी तिका वेंचून हाडपाक कांय जाणांनी जिवाची बाजी लावपाचें आस्वासन लेगीत दिलें. काँग्रेस श्रेश्ठींनी ताचेर गुपीतपणान अहवाल मागयलो आनी प्रियंका खातीर हो मतदारसंघ मात्तूय सुरक्षीत नाशिल्ल्याचें कळून आयले उपरांत परत इत्सुकांच्या नांवाचो विचार जालो आनी निमणे कॅप्टन विरियातो हांचें नांव जाहीर जालें.
गिरीश चोडणकार हांकां ह्या वेळार तांच्या ‘राहुलजीं’चे आशिर्वाद फळाक येतले अशें दिसतालें. पूण तशें जालें ना. कॅप्टन विरियातो हांचे पांय ओडपा खातीर फ्रान्सिस सार्दिन सयत जायते जाण कामाक लागतले. सार्दिन हांची राजकी कारकिर्द हाकाच लागून सोंपल्या. काँग्रेसाचो जाहीर प्रचार आयज संवसार पाडव्या पसून सुरू जाता तरीय प्रचाराक नेट मेळ मेरेन मतदानाची तारीख उदेवपाचो चड धोको आशिल्ल्यान दोनूय मतदारसंघांत नांवा पुरती लडत जरूर जातली तरी काँग्रेसी कडल्यान भाजपाक मेळिल्लो वॉकओव्हर अशेंच घडये ताचें स्वरुप आसपाक शकता. खेळांत वॉकओव्हराक मान्यताय आसली तरी राजकी खेळांत ल्हवू ल्हवू अशा लडतींत ताचें अस्तित्व दिसपाक लागतलें. विरोधा विणे वेंचणुकेचो उल्लेख जायते फावट वॉकओव्हर म्हणून करतातूय. आतां गोंयांत दोनूय मतदारसंघात विरोधा विणें वेंचणूक जावची ना तरी चुकीचे रणनितीक लागून काँग्रेसी कडल्यान भाजपाक मेळिल्लो हो वॉकओव्हर असोच ताचो निश्कर्श काडपाक येतलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
