भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशेच्या मिलाग्रीस सायबिणीचे वर्सुकीं फेस्त अदूं 15 एप्रिलाक जातलें. शेनवार 6 एप्रिलाच्यान फेस्ताची नोव्हेना सुरू जाल्यांत आनी 14 एप्रिलाक ती सोंपतलीं.
15 एप्रिलाक फेस्ताच्या दिसा सकाळीं 10 वरांचेर फेस्ताचें मुखेल मीस जातलें. फातोडेर 5.30 सावन मिसांक सुरवात जातली. 7, 8-30, आनी 12 वरांचेर इंग्लिशींतल्या मिसां जातली. सांजे 4 आनी 5.15 वरांचेर लेगीत मिसां जातलीं. नोव्हेनाच्या दिसांत सकाळी 6.30, 8 आनी सांजे 6 वरांचेर मिसा जातली.
फेस्त आनी नोव्हेना दिसा चर्च वाठारांत चर्च अधिकाऱ्यांनी 11 एप्रिलच्यान मनरिजवणेच्यो कार्यावळी आयोजीत केल्यात. तातूंत तियात्रां, गेमी आनी हावसीचो आसपाव आसा.
सध्या जमनी पोंदच्यान वीज केबल्स घालपा खातीर चर्ची सामकारचे रस्ते फोडल्यात. फेस्ता पयलीं ते सारके करपाचें काम म्हापशें पालिका मंडळाक करचें पडटलें. म्हापशेची मिलाग्रीस सायबीण शिरगांवच्या लईराईची भयण अशें मानतात. लईराई देवळांतल्या फेस्ता दिसा मिलाग्रीस सायबिणीक सागवात येता. राज्यांतले हिंदू धर्मीय लोक हे सायबिणीक मानतात. फेस्ताच्या दिसा पुराय गोंयांतल्यान व्हडा संख्येन म्हापश्या येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
