भांगरभूंय | प्रतिनिधी
अलाहाबाद, खबरां संस्था: हिंदू लग्न कायद्या खाला ‘कन्यादान’ म्हत्वाचें ना, असो निर्णय अलाहाबाद उच्च न्यायालयान एका प्रकरणांत दिला. तशेंच ‘सप्तपदी’ लग्न सुवाळ्यांतलो म्हत्वाचो विधी, अशेंय न्यायालयान म्हणलां. लखनौच्या आशुतोष यादव हांणी दाखल केल्ले एके पुनर्विचार याचिकेचे सुनावणे वेळार न्यायालयान हो निर्णय दिलो.
कांय दिसां आदीं आशुतोष यादव हांच्या मांवडच्या लोकांनी तांचे आड कागाळ दाखल केल्ली. उपरांत ह्या प्रकरणांत सत्र न्यायालयांत सुनावणी जाली. मात, सत्र न्यायालयान यादव हांचे आड निकाल दिल्लो. उपरांत यादव हांणी निर्णया आड उच्च न्यायालयांत पुनर्विचार दाखल केल्लो. म्हत्वाचें म्हळ्यार सत्र न्यायालयांत उलयतना तांच्या लग्नांत कन्यादान गरजेचें आशिल्ल्यान हो सुवाळो जावंक ना, असो दावो यादव हांणी केल्लो.
मजगतीं, यादव हांचे याचिकेचेर अलाहाबाद उच्च न्यायालयाचे न्या. सुभाष विद्यार्थी हांच्या खंडपिठा मुखार सुनावणी जाली. ह्या वेळार कायद्या प्रमाण ‘सप्तपदी’ हो लग्नां मजगतीचो एक म्हत्वाचो विधी आशिल्ल्यान ‘कन्यादान’ हो विधी म्हत्वाचो न्हय, अशें न्यायालयान म्हणलें. तशेंच यादव हांची पुनर्विचार याचिका रद्द केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
