लोकसभेंत  गोंयचें प्रतिनिधीत्व करपा खातीर खलप हांच्या सारकी व्यक्ती जायः अॅड फरेरा

भांगरभूंय | प्रतिनिधी

भांगरभूंय ।  खबरं मेज
पणजीः लोकसभेंत गोंयचें प्रतिनिधीत्व करपा खातीर रमाकांत खलल हांच्या सारके व्यक्तीची गरज आसा. हाचे पयलीं केंद्रांत कायदो मंत्री म्हणून तांणी तोखणायेचें काम केल्लें. एक प्रभावी वक्तो म्हणून गोंयचे लोक तांका वऴखतात. उत्तर गोंयांतले लोक तांकां आपलो प्रतिनिधी म्हणून लोकसभेंत धाडटले असो विश्वास हळदोणचे आमदार आनी उत्तर गोंय लोकसभा मतदारसंघाचे काँग्रेस संयोजन अॅड कार्लुस फरेरा हांणी सांगलें.
फाटल्या पंचवीस वर्सां सावन भाजपाचे खासदार आनी केंद्रांत मंत्री आशिल्ल्या श्रीपाद नायक हांणी राज्यांतल्या बेकार तरणाट्यांक रोजगार मेळोवन दिवपा खातीर कुस्कूटाचेंय काय केलें ना. तांच्याच पक्षातले लोक ताका मौनीबाबा म्हणपाक लागल्यात. अशे व्यक्तीक परत लोकसभेंत धाडपाचें सोडून गोंयच्या उदरगतीचे आनी राज्याचे प्रश्न मांडपा खातीर खलप हांकां हे खेपे लोक लोकसभेंत धाडटले अशें फरेरा हांणी सांगलें.
देवेगौडा आनी इंद्रकुमार गुजराल हांच्या केंद्रीय मंत्रिमंडळान कायदो मंत्री म्हणून खलप हांणी केल्ले कामगिरीक तोड ना. ताचें तुळेंत श्रीपाद नायक उबो लेगीत रावपाक शकना. गोंयांतल्या बेरोजगारी कडेन श्रीपाद नायक हांणी केन्नाच लक्ष दिलें ना. गोंयच्या तरणाट्यां खातीर तांणी कसले तरेच्यो येजवण्यो हाडल्या, उद्देग हाडले हें तांणी सांगचें. धारगळच्या आयुश्य हॉस्पिटलांत पेडण्यांतलेच न्हय जाल्यार पुराय गोयांतल्या चडश्या कोणाक काम मेळूंक ना. आसात ते बिगर गोंयकार आसात. मोपा विमानतळार बारीक सारीक कामां खातीर गोंयकार आनी व्हडल्या पदांचेर बिगर गोंयकार अशी परिस्थिती आसा.. केंद्रीय अर्थराज्य मंत्री, आयुश्य मंत्री, पर्यटन राज्यमंत्री म्हणून काम करतना श्रीपाद नायक हांचे कडेन खूब अधिकार आशिल्ले पणू तांणी गोंयां खातीर कांय केलें ना अशी टिका अॅड फरेरा हांणी केली.
भाजपाच्या केंद्रांतल्या आनी गोंयांतल्या सरकारा विशीं लोकां मदीं तिडक पातळल्ले कडेन आसा. तांचे मेरेन खपल हांचे नांव पावोवपा खातीर आमी प्रचाराचो आराखडो तयार केलो. बूथ समितीच्या कार्यकर्त्यांच्या मजतनी बसका घेवन आमी काँग्रेस पक्षाची ध्येय धोरणा साबार लोकां मेरेन पावोवन रमाकांत खलप हांका वेंचून दिवपाचो संदेश पावयतले अशी म्हायती अॅड फरेरा हांणी दिली.