भांगरभूंय | प्रतिनिधी
भांगरभूंय । प्रतिनिधी
पर्वरीः साळगांव पुलिसांनी शेनवारा रातीं सांगोल्डें हांगच्या एका बंगल्याचे छापो घालून थंय चलवी आयपीएल सट्टा रॅकेटाचो पर्दाफाश करून तीन जाणांक अटक केली.
सांगोल्डें बेलाविस्ता हांगच्या मालहम विल्हांत सध्या सुरू आशिल्ल्या इंडियन प्रीमियर लीग क्रिकेट सर्तीच्या (आयपीएल) मॅचींचेर सट्टो लावपाचें रॅकेट चलता अशी म्हायती साळगांव पुलिसांक तांच्या खबऱ्यान दिल्ली. ते प्रमाण तांणी तेळणी करून छापो घातलो. थंय ऑनलायन मोड, मोबायल फोनआनी लॅपटॉपां वरवीं सट्टो (बेटिंग) घेवपी घेवपी ठक्कर कल्पेशभाय चंदूलाल, ठक्कर संदीपकुमार जयेशभाय आनी मयूर पटेल ह्या मूळ गुजरांतल्या तिगांक रंगेहात धरलें.
रॉयल चलेंजर्स बेगळुरू आनी राजस्थान रॉयल्स हाचे मदलें आयपीएल मॅचीचें ते बेटिंग घेताले. पुलिसांनी 10 मोबायल, 12 लॅपटॉप, 3 रुटर्स आनी 3 नोटबूक मेळून 4.50 लाख रुपयांचो मुद्देमाल जप्त केलो. गोंय, दमण आनी दीव जुगार प्रतिबंदक कायद्याच्या कलम 3 खाला साळगांव पुलिसांनी गुन्यांव नोंद केला.
पुलीस निरीक्षक सोमनाथ माजीक हांच्या मार्गदर्शना खाला उपनिरीक्षक किशोरकुमार नायक, हवालदार विशांत मयेकार, पुलीस विजय पाळणी, यशवंत साखळकार, लेडी पुलीस सोनिया माशेलकार हाणी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
