भांगरभूंय | प्रतिनिधी
सिने मा आवडना असो एकूय मनीस आसचो ना. ल्हान आसूं वा व्हड सगल्यांक तो आवडटा. जे कोण सिनेमा तयार करतात, दिग्दर्शन करतात, अभिनय, लेखन करतात, ते ताचो घरच्या घरा अभ्यास करता आसतले. थोडे खाशेले शाळेंत वचून हो अभ्यास करतात आसतले. नाजाल्यार कार्यशाळांक हाजिरी लायतात आसतले. कोलकाताचे एक सिने अभ्यासक राबिन घोष हांणी एक फिल्म डायरी वा निबंध तयार केला, जातूंत संवसारांतल्या 16 दिग्दर्शकांची म्हायती तुमकां पळोवपाक वा वाचपाक मेळटली. खेरीज हो संग्रह तुमी कायम तुमचे कडेन दवरूं शकतात. हाचे खातीर ते तुमचे लागीं ईमेल आनी परवडपा सारकी फी घेतले.
आॅनलायन तंत्रज्ञानाक लागून हें आतां शक्य जालां. ताका लागून तुमी खंयचेय सुवाते वयल्यान कसलोय अभ्यास करपाक शकतात. ते खातीर थारावीक वेळ दिवचो पडटा. पूण तोच अभ्यास मेल करीत जाल्यार तुमी तो फावता त्या वेळार पळोवपाक शकतात. अभ्यास करपाक शकतात. संवसारीक दर्जाचे दिग्दर्शक भारतांत ना अशें ना. व्ही. शांताराम, सत्यजित रे, दादासाहेब फाळके, मृणाल सेन, राज कपूर सारके जायते आसात. सिनेमांतले मनीस म्हणले काय कोलकाता शार याद जाता. थंय देशांतलें पयलें थेटर सुरू जालें. कला, संस्कृतीच्या मळाचेर ह्या शारांत व्हडलें योगदान दिलां. पश्चिमी संगीत वाजोवपी गोंयकार कलाकार ह्याच शारांत नांव जोडपाक पयलीं गेल्ले. राॅबिन घोष ह्याच शारांतले. तांणी आपल्या उपक्रमा वरवीं अशोक विश्वनाथन, जे एफटीआयचे आदले डीन आनी जायते पुरस्कार फावो जाल्ले दिग्दर्शक हांणी मेळून मास्टर आॅफ सिनेमा हो निबंधाचो उपक्रम खासा सिनेमाच्या अभ्यासकांक उपलब्ध करून दिला. हो एक प्रयोग. सत्यजीत रे, बर्गमन गोदार्द, अकिरा कुरोसावा, रित्वीक घटक, फेलिनी, अदूर गोपालकृष्णन, आल्फ्रेड हिचकाॅक, पोलान्स्की सारके नामनेचे दिग्दर्शक हांची म्हायती, तांचें व्हडपण, तांचे म्हायतीची लिंक तुमकां परवडपी दरान मेळटली. हो अभ्यास तुमकां सिनेमाचो आनंद खऱ्या अर्थान घेवपाक मजत जातली. ह्या दिग्दर्शकांची भाशा, शैली, काणी सांगपाची पद्धत ह्यो गजाली सिनेमा पळयतना अभ्यासाचे नदरेन आमी पळयतात अशें ना, पूण मास्टर्स आॅफ सिनेमा तुमकां हे नदरेंतल्यान मजत करतले. तुमकां कितें खटकता, म्हायती जाय जाल्यार तुमी तांचे कडेन फोनाचेर उलोवं शकतात. (9903407870) फोन लागलो ना जाल्यार www.infocumstudio.in हो ईमेल आसा.
एखादो सिनेमा अभ्यास करून पळोवपाक गेल्यार बऱ्योच गजाली हाताक लागतात. दिग्दर्शकाचे नदरेन पड्ड्या वयली प्रत्येक गजाल कसल्या तरी कारणाक लागून आसता, ताचो अभ्यास ताणें केल्लो आसता, हें सामान्य रसिकाक कळटाच अशें ना. पूण घोषांचो हो निबंध वाचीत जाल्यार ताची कल्पना येवं शकता. निवेदन इंग्लीश भाशेंत आसा. सत्यजित रे, मृणाल सेन, श्याम बेनगल, अदूर गोपालकृष्णन, अमोल पालेकार, सई परांजपे सारके दिग्दर्शक, तांचीं नांवां आमी फक्त आयकतात, तांणी केल्ल्या सिनेमांच सगलेच दखल घेतातूच अशें ना. श्री. घोष हांच्या मास्टर्स आॅफ सिनेमाच्या निमतान तुमकां व्हिडियो व्याख्यानां पळोवपाक, आयकूपाक मेळटलीं. हातूंतल्यान सिनेमा पळोवपाची नवी नदर मेळटली. दुबावूच ना. खंयच्याय फांट्याचो विद्यार्थी, तरणाटो हो अभ्यास करपाक शकता. तुमचे भितर सिनेमाची बरी जाण येवची म्हूण सुटयेंत हो वावर करुं येता. अर्थांत तुमकां जी लिंक मेळटली, तिचो उपेग तुमिी केन्नाय करूं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
