भांगरभूंय | प्रतिनिधी
कोरगांव, बातमीदार : सरकारान पेडणें म्हाला खातीर विभागीय आराखडो तयार करून मांद्रें गांवाचेर अतिक्रमण हाडलें आनी त्या अन्याया आड ऍड. रमाकांत खलप आनी मनोज परब हांणी आवाज करून ते पेडणेंचे जनते वांगडा रावले. मात खासदार श्रीपाद नायक हांणी हे विशीं कांयच उलोवंक नात. आयज जो उमदेवार अतिक्रमणां आड रावतलो आनी तशें पंचायतीक बरोवन दितलो तांचे वांगडा मांद्रेंचे सरपंच म्हणून रावपाचो निर्णय जनतेक विस्वासांत घेवन घेतलों, अशी भुमिका मांद्रें सरपंच प्रशांत नायक हांणी जाहीर केली.
उमेदवार वेंचून येतले काय ना हे विशीं आमी कांयच सांगपाक शकना. मात दरेक उमेदवारांनी जाग्यांच्या सेटलमेंटा विरोधांत रावपाची लेखी आमकां दिवचें. मांद्रें गांवच्या चारूय वटांनी दोंगर आसात. थंयच जर वेवसायीक बांदकाम जाल्यार सैमाचो विध्वंस जातलो. पर्यावरण वाटावपा खातीर फुडार्यां कडल्यान लेखी आस्वासन गरजेचें, अशें सरपंच नायक हांणी म्हणलें.
हांव भाजपा पक्षाचो न्हय. मात फाटलीं २० वर्सां सावन हांव भाजपाचो समर्थक आशिल्ल्यान भाजपाकूच मतदान करतां. भाजपा जे तरेन सरकार चलयता आनी गांवची उदरगत करता ताका लागून हांवें आयज मेरेन तांकां मतदान केलें. हांवें भाजपान प्रवेश करूंक ना. मांद्रें गांवचो सरपंच म्हणून म्हजो खासदार श्रीपाद नायक हांकां दोंगरार जावपी बेकायदेशीर अतिक्रमण तुमी आडायतले? असो प्रस्न आसतलो, अशें तांणी स्पश्ट केलें.
दोंगरांचेर उदरगत नाका
नगरनियोजन विभाग दोंगरां वयले जागे सेटलमेंट झोनांत रुपांतर करतात. उदरगतीक आमचो विरोध ना. मात दोंगरार उदरगत आमकां मान्य ना. रस्त्या कुशीक उदरगत जाल्यार हरकत ना. दोंगर कापल्यार फुडाराक भुरग्यांक दोंगोर कशे आसलें हें चित्र काडून दाखोवपाची पाळी आमचेर येतली, अशें सरपंच नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
