भांगरभूंय | प्रतिनिधी
पणजी, प्रतिनिधी : लोकसभा वेंचणूकेंचे उमेदवार निश्चित जाल्ल्यान आतां वेंचणूकेंचे चित्र स्पश्ट जालां. केंद्रीय मंत्री श्रीपाद नायक हांची ही सातवी लोकसभा वेंचणूक आसा. हाचे पयलीं तांणी 6 खेपो लोकसभा वेंचणूक लढयल्या. गोंयांत तरी सगळ्यांत चड खेपो लोकसभा वेंचणूक लढोवपाचो मान श्रीपाद नायक हांकांच फावो जाता.
काँग्रेसीचे उत्तर गोंयचे उमेदवार एड. रमाकांत खलप हे आतां चवथे खेप लोकसभा वेंचणूक लढयतात. श्रीपाद नायक हांणी 1991 वर्सा सगळ्यात पयलीं दक्षीण गोंयांतल्यान लोकसभा वेंचणूक लढयल्ली. तांचे पयलेच लोकसभा वेंचणुकेंत काँग्रेस ऊमेदवार एदुआर्द फालेरो हांचे कडल्यान ते हारिल्ले. हाचे उपरांत मात उत्तर गोंयांतल्यान 1999 सावन ते सेगित जैतीवंत जायत आसात. खलप हांणी 1996, 1998 आनी 1999 वर्सा लोकसभा वेंचणुको लढयल्यात. 1996 आनी 1998 ची लोकसभा वेंचणूक तांणी मगो पक्षाच्या उमेदवारीचेर लढयल्या.
एदुआर्द फालेरो हांणी 1977, 1980, 1984, 1989, 1991 आनी 1996 अशे 6 खेपो लोकसभा वेंचणुको लढयल्यात. 1996 वर्साची लोकसभा वेंचणूक सोडली जाल्यार हेर सगळ्यो वेंचणुको तांणी जिखल्यात. फ्रांसिस सार्दीन हांणी 1998, 2007 (पोटवेंचणूक), 2009 आनी 2019 ह्यो लोकसभा वेंचणुको जिखल्यात. सार्दीन हे एकदाय लोकसभा वेंचणुकेंत हारूंक नात. चर्चील आलेमाव 3 खेपो (1996, 1998 आनी 2004) लोकसभा वेंचणूक लढयल्या. श्रीपाद नायक, फ्रांसिस सार्दीन आनी एदुआर्द फालेरो हांणी सगळ्यांत चड खेपो लोकसभा वेंचणुको लढयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
