भांगरभूंय | प्रतिनिधी
मडगांव, प्रतिनिधी : कदंब बसस्टॅण्डाचेर रस्तो हुपपी एका १२ वर्सां पिरायेच्या चल्याक बसीन धपको दिलो. ह्या अपघातांत बस पांयां वयल्यान गेल्ल्यान त्या चल्याच्या पांयांक गंभीर दुखापत जाल्या. ह्या प्रकरणांत फातोड्डें पुलिसांनी बस चालक श्रीशैल बिरादार (३४) हाचे आड गुन्यांव नोंद केला.
मेळिल्ले म्हायती प्रमाण, ही घडणूक शेनवारा मडगांवां बसस्टॅण्डा लागसारा घडली. मूळ सांगली महाराष्ट्र हांगचो अभय बबलू परदेशी हो १२ वर्सां पिरायेचो चलो बसींतल्यान देंवून रस्तो हुपतालो. इतल्यान कदंब बसचालक श्रीशैल बिरादार चलोवपी बसीचो धपको ह्या चल्याक लागलो. ह्या धपक्यांत बबलू हाचो पांय बसीच्या टायरा पोंदाक गेल्ल्यान तो गंभीर जखमी जालो. ताका रोखडोच उपचारा खातीर दक्षीण गोंय जिल्हो हॉस्पिटलांत व्हेलो.
हे विशीं पुलिसांक म्हायती मेळटांच ते अपघाता सुवातेर वचून तांची पंचनामो केलो. पुलिसांनी बसचालक श्रीशैल बिरादार हाचे आड दुसर्यांचो जीव धोक्यांत घाल्ले खातीर गुन्यांव नोंद केला. पुलीस निरीक्षक नाथन आल्मेदा हांच्या मार्गदर्शना खाला विल्टन रिबेलो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
