भांगरभूंय | प्रतिनिधी
दुसर्या शारांत घर सोदप हें एक व्हडलें काम, कारण जरी तुमकां घर मेळ्ळें तरी थंयचो घराचो धनी तुमकां आवडटलोच अशें ना. केन्ना केन्ना घर धनी आवडटा जाल्यार घर आवडना. भाड्याच्या घरांनी अशे जायते प्रस्न चालूच आसतात, जे आतां सामकेच सामान्य दिसतात. मात आयज आमी तुमकां एका अश्या भाड्याचे कुडी विशीं सांगपाचीं आसात जाचेर तुमकां विस्वास बसचो ना.
जशें सगळ्यांक खबर आसा की परदेशांत भाडें दिवप ही एक सामकी वेगळीच गजाल. हांगा केन्ना ल्हानशी सुवात कोट्यांनी विकतात, जाल्यार केन्ना अश्या जाग्याचें भाडें हजारांनी घेतात, जाका घर लेगीत म्हणूं येना. मात हांगची एक खाशेली गजाल म्हणल्यार हांगा पालक भुरग्यांक आत्मनिर्भर करपा खातीर सुरवातेक सावनूच जायत्यो येवजण्यो राबयतात. अशीच एके घडणुकेची चर्चा सध्या लोकां मदीं सुरू आसा.
इंग्लीश वॅबसायट द न्यूयॉर्क पोस्टाच्या अहवाला प्रमाण, सामन्था बर्ड नांवाचे एके बायलेन सोशल मिडियाचेर कितें तरी शेअर केलां. तातूंत तिणें सांगलां, आपूण आपल्या भुरग्यां कडल्यानूय घराचें भाडें घेतां. अजापाची गजाल म्हळ्यार हीं भुरगीं फकत ६, ८ आनी ९ वर्सां पिरायेचीं. दर म्हयन्याक ती ६ डॉलर भाडें दिता अशें ते बायलेन आपल्या पोस्टांत म्हणलां. तातूंत तांकां भाड्याक १ डॉलर, जेवणाच्या सामाना खातीर १ डॉलर आनी हेर गरजेच्या खातीर १ डॉलर फारीक करचे पडटात. उपरांत उरिल्ल्या तीन डॉलरांचो ती मागीर तांचे कडल्यान हिशेब घेता.
हे विशीं तिणें सांगलें, अशें केल्ल्यान भुरग्यांक पयशांचें मोल समजता आनी तांकां आपले पयशे हुशारकायेन खर्च करपाक मदत जाता. हे आवयचो पोस्ट इंटरनॅटाचेर आयले बरोबर व्हायरल जालो. हें पळयल्या उपरांत लोकांनी वेगवेगळ्यो प्रतिक्रिया दिल्यो. एकल्यान बरयलां, ‘ही पद्दत सामकी चुकीची आसा, भुरग्यांचेर वायट परिणाम जातलो कारण तांकां ल्हान पिरायेचेर पयशे दिसतले’, जाल्यार दुसर्यान वापरप्यान बरयलां, ‘ही पद्दत बेस्ट! कारण ही भुरग्यांक पयशे वेवस्थापनाची शिकवण दितली’ आनी हेर जायत्या जाणांनी ह्या पोस्टाचेर कमेंट्स केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
