भांगरभूंय | प्रतिनिधी
नवी दिल्ली, खबरां संस्था: केंद्रीय तपास ब्युरोन (सीबीआय) भुरग्यांचो वेपार करपी एके व्हडले टोळयेक धरल्या. हरियाणा, दिल्ली, युपी, मध्य प्रदेश, पंजाब, झारखंड, छत्तीसगढ, महाराष्ट्र, कर्नाटक ह्या सारक्या १५ परस चड राज्यांनी हो गट सक्रीय आशिल्लो. दरेक भुरग्याक देड ते दोन लाख रुपयांक विकते घेवन तीं भुरगीं नाशिल्ल्या जोडप्यांक ४ ते ६ लाख रुपयांक भुरगीं विकतालीं. प्राथमीक तपासांत ५० भुरग्यांची विक्री जाल्ल्याची खात्री जाल्या.
देशभरांत नवजात भुरगीं विकपाच्या वेवसायाची म्हायती सीबीआयक दिल्ली, हरियाणाच्या सोनीपतांतल्यान मेळिल्ली. ताचेर आदारून एजन्सीन दिल्ली आनी हरियाणा पुलिसां वांगडा मेळून शेनवारा सोनेपतांतल्या ७ सुवातींचेर धाड घाली. तशेंच आरोपीं कडल्यान तीन सानुलीं भुरगीं जप्त केल्यांत. ह्या भुरग्यां मदलें एक भुरगें फकत दोन दीस आनी दुसरें १५ दिसांचें आसा. तशेंच सीबीआयन आरोपीं कडल्यान ५.५ लाख रुपया रोख पयशे जप्त केल्यात. सीबीआयन सोनीपतांतल्यान सूत्रधर नीरज, दिल्लींतल्या पश्चिम विहारांतल्यान इंदू पवार, पटेलनगरांतल्यान असलम, कन्हैयानगरांतल्यान पुजा कश्यप, कराला हांगा रावपी रितू, मालवीयनगर हांगच्यान अंजली आनी कविता हांकां अटक केल्या.
भुरगीं हॉस्पिटलांतल्यान चोरतालीं
आदीं वेगवेगळ्या नेटवर्कांतल्यान भुरग्यांची खरेदी करताले अशें आरोपींनी सांगलें. कांय भुरगीं हॉस्पिटलांतल्यान चोरून व्हरतात, जाल्यार कांय भुरगीं तांच्यो गरीब आवय-बापायन वा आंकवार चलयो स्वता विकतात. कांय गँग वांगडी सॅरोगेट म्हणूनय काम करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
