भांगरभूंय | प्रतिनिधी
म्हापशें, प्रतिनिधी ः ‘आपा’चे राष्ट्रीय संयोजक अरविंद केजरीवाल हांणी केल्ल्या विधाना आडची कागाळ म्हापशें न्यायालयान भायर मारली. ‘पयशे कोणाय कडल्यान घेयात, मत मात सान्नीकूच दियात’ अशें विधान केजरीवाल हांणी केल्लें.
दिल्लीचे मुख्यमंत्री आनी ‘आपा’चे राष्ट्रीय संयोजक अरविंद केजरीवाल हांचे आड वेंचणुकेच्या आदर्श आचारसंहितेचें उल्लंघन केल्ल्याची कागाळ म्हापशें न्यायालयान भायर मारली. 2017 चे विधानसभा वेंचणुके वेळार केजरीवाल हांणी म्हापशेंच्या टॅक्सी स्टँडाचेर जाल्ले भौशीक सभेंत ‘पयशे कोणाय कडल्यान घेयात, मत मात सान्नीकूच दियात’ अशें विधान केल्लें.
मतदारांनी सगळ्या पक्षां कडल्यान पयशे घेवचे, पूण मत मात सान्नीकूच (आपाचें चिन्न) दिवचें अशें सांगपी केल्ले विधान हो तांणी मतदारांक दिल्लो सल्लो आसा. ताणें आपल्या राजकी पक्षा वतीन मतदारांक कसलेंच समाधान दिवंक ना. देखून भा.दं.सं.च्या कलम 177 ई प्रमाण कलम 177ब खाला ख्यास्त दिवपी गुन्यांवाचे घटक तयार केल्ले नात.
इतलेंच न्हय तर वयल्या कलमा खाला ख्यास्त दिवपी गुन्यांवा खातीर दुबाविता आड कारवाय करपाक फावो तें कारण ना. देखून सीआरपीसीच्या कलम 203 प्रमाण ही कागाळ न्हयकारप बंधनकारक आसा. असो निश्कर्श दिवन नांदवत म्हापशें पयल्या वर्गाच्या न्यायालयांतल्या न्या. शिल्पा पंडित हांणी केजरीवाल हांच्या आडची याचिका न्हयकारली.
मजगतीं, तेन्नाचे विधानसभा वेंचणूक अधिकारी गुरूदास देसाय हांणी 22 डिसेंबर 2017 दिसा केजरीवाला आड आदर्श आचारसंहितेचें उल्लंघन केल्ल्याची कागाळ दाखल केल्ली. उल्लेख केल्ली कागाळ 2 फेब्रुवारी 2018 दिसा म्हापशें न्यायालयांत धाडून गुन्यांव नोंद केल्लो. न्यायालयान केजरीवालाक समन्स जारी करून न्यायालयांत हजर रावपाचो आदेश दिल्लो. तशेंच म्हापशें पुलीस निरिक्षकाक कागाळीची चवकशी करून सीआरपीसीच्या कलम 203 खाला अहवाल सादर करपाचे निर्देश दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
