भांगरभूंय | प्रतिनिधी
नवी दिल्ली, खबरां संस्था ः भारतीय संरक्षण क्षेत्रा खातीर बरी खबर. इतिहासांत पयलेच खेपे भारतीय संरक्षण क्षेत्रान विक्रमी (Record defense exports) निर्गत केल्या. फाटल्या अर्थीक वर्साच्या तुळेंत अंदूं संरक्षण निर्गतींत 32.5 टक्क्यांनी वाड जाल्या. भारतान पयलेच खेपे 21 हजार कोटींचो आंकडो हुपलो. हांतूत खाजगी क्षेत्राचें योगदान 60 टक्के, जाल्यार संरक्षण क्षेत्रांतल्या भौशीक उपक्रमांचे योगदान 40 टक्के आसा. संरक्षण मंत्री राजनाथ सिंह हांणी ट्विटरा वरवीं ही म्हायती दिल्या.
फाटल्या 10 वर्सांत संरक्षण निर्गतींत 31 पटींनी वाड
अर्थीक वर्स 2023-24 वर्सा संरक्षण निर्गत 21,083 कोटी रुपया (सुमार 2.63 अब्ज अमेरिकन डॉलर) इतले विक्रमी उंचायेचेर पावली. फाटल्या अर्थीक वर्साच्या 15,920 कोटी रुपया संरक्षण निर्गती परस 32.5 टक्क्यांनी चड आसा. ताज्या आंकडेवारी प्रमाण फाटल्या 10 वर्सांत संरक्षण निर्गत 2013-14 वर्साच्या तुळेंत 31 पटींनी वाडल्या. संरक्षण उद्देग, संरक्षण क्षेत्रांतल्या खाजगी कंपनींनी आनी भौशीक उपक्रमांनी संरक्षण निर्गत चडांत चड मेळोवपाखातीर व्हड यत्न केल्यात. ह्या आंकड्यांत खाजगी क्षेत्र आनी संरक्षण क्षेत्रांतल्या भौशीक उद्देगांचें योगदान अनुक्रमान 60 टक्के आनी 40 टक्के आसा.
खंयच्या काळांत कितली निर्गत?
तशेंच 2023-24 अर्थीक वर्सांत संरक्षण निर्गतदारांक दिल्ले निर्गत परवान्यांचो आंकडो वाडला. अर्थीक वर्स 2022-23 वर्सा 1,414 निर्गत परवाने आशिल्ले जाल्यार 2023-24 वर्सा हो आंकडो 1,507 मेरेन पावलो. दोन दशकांची तुळा केल्यार 2004-05 ते 2013-14 आनी 2014-15 ते 2023-24 ह्या काळांत संरक्षण निर्गतींत 21 पटींनी वाड जाल्ल्याचें दिसून येता. 2004-05 ते 2013-14 मेरेन वट्ट संरक्षण निर्गत 4,312 कोटी रुपया आशिल्ली. जी 2014-15 ते 2023-24 मेरेन 88,319 कोटी रुपया जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
