भांगरभूंय | प्रतिनिधी
पणजी, बातमीदार ः काँग्रेसीन उत्तर गोंयांतल्यान आदले केंद्रीय मंत्री ॲड. रमाकांत खलप आनी दक्षीण गोंयांतल्यान कॅ. विरिएतो फर्नांडीस हांकां उमेदवारी जाहीर केल्या. वेंचणुके संबंदी तिनूय पक्षांचे उमेदवार जाहीर जाल्ल्यान निमाणे वेंचणुकेचें चित्र स्पश्ट जालां.
सत्ताधारी भाजपाचे विरोधी काँग्रेस आनी रिव्हॉल्यूशनरी गोवन्स (आरजीपी) हे तीन पक्ष हे वेळच्या लोकसभा वेंचणुकेंत आसात. आरजीपीन सगळ्यांत पयलीं उत्तरेक मनोज परब आनी दक्षिणेक रुबर्ट परेरा हांच्या नांवांची घोशणा करून वेंचणुकेचो प्रचार सुरू केलो. ते उपरांत भाजपान पयलें वळेरेंतल्यान केंद्रीय मंत्री श्रीपाद नायक हांकां उमेदवारी जाहीर केली. पूण, दक्षीण गोंयांतली उमेदवारी कोणाक दिवची हें विशीं चिंता कितलेशेच दीस चालूच आशिल्ली. निमाणे हे खेपे दक्षीण गोंयांत बायल उमेदवाराक प्राधान्य दिवपाचें थारावन भाजपान नामनेचे वेवसायीक श्रीनिवास धेंपो हांची घरकान्न पल्लवी हांका उमेदवारी जाहीर करून प्रचारांक सुरवात केली.
दक्षीण गोंयचो उमेदवार भाजपान जाहीर केले बरोबर सगळ्यांक दिसलें की काँग्रेस दोनूय मतदारसंघांतल्यान उमेदवार जाहीर करतले. पूण वेंचणुकेंत उमेदवारी वयल्यान प्रदेश काँग्रेसींत फूट पडली. आदले प्रदेशाध्यक्ष गिरीश चोडणकार हांणी दक्षीण गोंयांतल्यान उमेदवारी आपणाकूच मेळटली अशी आस्त बाळगून प्रचार सुरू केलो. जाल्यार उत्तर गोंयच्या उमेदवारीचे आशेन प्रदेश काँग्रेसीचे उपाध्यक्ष सुनील कवठणकार कांय दिसा सावन पक्षांत सक्रीय जाल्ले. पूण, काँग्रेस प्रभारी माणिकराव ठाकरे, प्रदेशाध्यक्ष अमित पाटकार आनी विरोधी फुडारी युरी आलेमाव निमाणे मेरेन रमाकांत खलप आनी कॅ. विरिएतो फर्नांडीस ह्या दोगांयच्या नांवांचेर ठाम रावलें. देखून काँग्रेसीचे वेंचणूक समितीन ह्या तिगांयच्या मतांक प्राधान्य दिवन ॲड. खलप आनी विरिएतो फर्नांडीस हांचीं नांवां जाहीर केली.
दोनूय उमेदवारांची वळख…
ॲड. रमाकांत खलप
० १९७४ सावन राजकारणांत सक्रीय
० सुमार 25 वर्सां आमदार
० राज्यांत विरोधी पक्ष फुडारी, मंत्री, उपमुख्यमंत्री म्हणून काम केलें
० केंद्रांत कायदो राज्यमंत्री म्हुण जापसालदारकी सांबाळ्ळ्या
० आदर्श संसद सदस्य म्हणून भोवमान
कॅप्टन विरिएतो फर्नांडीस
० भारतीय नौदलाचे निवृत्त अधिकारी
० कारगिल झुजांत वांटो
० मेकॅनिकल इंजिनियरिंग पदवी मेळयल्या
० पुण्यांतल्यान एमबीए पदवी
० समाजीक वावुरपी, पर्यावरणमोगी
० फाटले विधानसभा वेंचणुकेंत दाबोळेंतल्यान मंत्री मॉविन गुदिन्हो आड फकत 1,570 मतांनी हार.
उत्तर गोंय : श्रीपाद नायक विरुद्ध रमाकांत खलप विरुद्ध मनोज परब
दक्षीण गोंय : पल्लवी धेंपो विरुद्ध विरिएतो फर्नांडीस विरुद्ध रुबर्ट परेरा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
