भांगरभूंय | प्रतिनिधी
न्यूयाॅर्क, खबरां संस्था ः भारतांतले लोक सध्या खर उश्णतेचो त्रास सोंसतात. वाडत वचपी तापमानाक लागून लोक चिंतेत आसात. मजगतीं, एप्रिल ते जून मेरेन भारतांत उश्णताय ल्हारांची शिटकावणी भारतीय हवामान खात्यान दिल्या. फाटल्या कांय दिसांत तापमानांत मात्सी वाड जाले उपरांत आमची अवस्था अशीं आसा जाल्यार संवसारांतल्या सगळ्यांत उश्ण सुवातींनी आशिल्ल्या लोकांची अवस्था कितें आसतली?
कॅलिफोर्नियांच्या डेथ व्हॅलीतल्या फर्नेस क्रीक ही संवसारांतली सगळ्यांत उश्ण सुवात. १९१३ वर्सा जमनीसावन १.५ मीटर उंचायेचेर दवरिल्ल्या थर्मामीटरांत हवेचें तापमान ५६.७ अंश सेल्सियस नोंद जालें जे अजूनूय तशेंच उरला. संवसारीक हवामान संघटनेनय ही म्हायती खरी अशें म्हणलां.
बीबीसीच्या सायन्स फोकस संकेतथळा प्रमाण १० जुलय १९१३ दिसा फर्नेस क्रीक हांगाचें तापमान ५६.७ अंश सेल्सियस आशिल्लें. तें फकत हवेचें तापमान आशिल्लें, जमनीचें तापमान आनीकय चड आशिल्लें. 15 जुलय 1972 दिसा डेथ व्हॅलीचें जमनी वयलें तापमान 93.9 अंश सेल्सियस इतलें नोंद केल्लें.
बिझनेस इनसाइडराच्या २०२३ वर्साच्या अहवाला प्रमाण डेथ व्हॅलींत सुमार ६०० लोक रावतात. गिमाच्या दिसांनी ह्या लोकांक आपूण भट्टेंत चलता अशें दिसता. हांगाचें तापमान गिमाच्या दिसांनी ५२- ५३ अंश सेल्सियस मेरेन पावता. आमच्या गोंयांत चडांत चड ३८ अंश सेल्सियस तापमान वाडटा.
हे सुवातेर प्रतिकूल परिस्थिती आसून लेगीत रोडरनर (Roadrunners- एक प्रकारचे सुकणें), चकवाला (Chuckwalla- पालीचो एक प्रकार), डेझर्ट पपफिश, कंगारू रॅट (Kangaroo Rat- हुंदराची एक जात) अशी कांय रानवटी जनावरय हांगा मेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
