भांगरभूंय | प्रतिनिधी
मडगांव: कामार वचूंक भायर सरिल्ल्या रेवोनिको फर्नांडीस (41) हांच्या दुचाकी मुखार बाराडी वेळ्ळी हांगा अचकीत सुणो मदीं आयिल्ल्यान दुचाकी घसरली. हातूंत दुचाकी चालक रेवोनिको हांकां गंभीर दुखापत जाली. गोंय वैजकी म्हाविद्यालयाच्या हॉस्पिटलांत उपचार सुरू आसतना ताका मरण आयलें. ह्या प्रकरणांत कुंकळ्ळी पुलिसांनी प्रकरण नोंद करून घेतलां.
काणकोण आगोंद हांगासरलो रेवोनिको फर्नांडीस हो रावणफोंड मडगांवां मिलिटरी कॅम्पांत नितळसाणीचें काम करतालो. बिरेस्तारा फांतोडेर पांच वरांच्या सुमाराक रेवोनिको हो आपले अॅक्टिवा स्कुटरी वेल्यान काणकोण सावन मडगांवचे दिशेन येता आसतना बाराडी वेळ्ळी वाठारांत हो अपघात घडलो. रेवोनिको दुचाकी वेल्यान वता आसतना अचकीत सुणो गाडये मुखार आयलो आनी ताका धपको दिलो तेन्ना दुचाकी चालक रस्त्यार पडलो.
ह्या अपघातांत रेवोनिका हाका गंभीर दुखापत जाली. रस्त्या वेल्यान वचपी वाहन चालकां कडल्यान पुलिसांक हाची म्हायती दिवन एम्बुलन्स आपोवन रेवोनिका हाका उपचारा खातीर दक्षीण गोंय जिल्हो हॉस्पिटलांत व्हेलो. पूण गंभीर जखमी जाल्ल्या रेवोनिकाक फुडल्या उपचारा खातीर बांबोळे गोमॅकाँत दाखल केलो.
ताचे भलायकेंत सुदार जालो ना आनी शुक्रारा ताका मरण आयलें. उपरांत कुंकळ्ळी पुलिसांनी सदर वाहन अपघात प्रकरण नोंद केलां. मरणा उपरांतचे तपासणे उपरांत रेवोनिका फर्नांडीस हाची कूड कुटुंबाचे सुवादीन करतले. कुंकळ्ळी पुलीस निरिक्षक डायगो ग्रासियस हांच्या मार्गदर्शना खाला पुलीस उपनिरिक्षक कविता रावत ह्या प्रकरणाचो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
