भांगरभूंय | प्रतिनिधी
पल्लवी धेंपो: बाणावले, कुडटरे मतदारसंघांनी प्रचार
मडगांव: राज्यांत हिंदू, मुस्लीम आनी ख्रिश्चन हे सर्वधर्मीय एकवटान रावतात. गोंय हें समाजीक, धर्मीक एकवटाचें प्रतीक आसा. खंयचीय जाबसालदारकी एक बायल मनीस समर्थपणान सांबाळटा. प्रधानमंत्री नरेंद्र मोदी हांणी महिला सक्षमीकरणाचो नारो दिला, ताका साथ दिवची. सगल्यांच्या आशिर्वादान गोंयच्या दोनूय सुवातांचेर भाजपाचे उमेदवार वेंचून येतले आनी विकसीत भारताचें सपन पुराय जावपाक हातभार लागतलो असो विस्वास पल्लवी धेंपो हांणी उक्तायलो.
भाजपाच्यो दक्षीण गोंय उमेदवार पल्लवी धेंपो हांणी शुक्रारा बाणावले आनी कुडटरी मतदारसंघांत प्रचार केलो. ह्या वेळार मडगांवचे आमदार दिगंबर कामत, दामू नायक, विनय तेंडुलकार, स्वप्नील बांदोडकार, सुवर्णा तेंडुलकार, दीपक नायक आदीं मानेस्त हाजीर आशिल्ले.
कोलव्यां कार्यकर्त्यां बरोबरचे बसकेंत पल्लवी धेंपो हांणी सांगलें, म्हजें भुरगेंपण आनी शिक्षण दक्षीण गोंयांतूच जालां. दक्षीण गोंयच्या लोकांचो हो मोग अजुनूय म्हाका मेळटा. लोकांच्या आशिवार्दान आनी सहकार्यांतल्यान भाजपाचें कमळ राज्यांत लोकसभेच्या दोनूय सुवातांचेर फुलतलें. बायलां मदीं खूब ताकद आसता. ती घर सांबाळपी आसूं वा नोकरी करपी आसूं, सगली जापसालदारकी योग्य रितीन सांबाळटा. बायलां सगल्या मळार मुखार आसात आनी भारतीय जनता पक्ष बायलांचो आदर करता, सन्मान दिता. बायलां खातीर विवीध येवजण्यो केंद्र आनी राज्यांतल्या भाजपा सरकारान राबयल्यात. राज्यांतलीं विकासकामां चालीक लायल्यांत अशें पल्लवी धेंपो हांणी म्हणलें.
मुखार उलयतना तांणी म्हणलें, रस्ते, पूल अशा साधन सुविधां सयत नॅशनल फॉरेन्सीक युनिव्हर्सिटी, आयआयटी, एनआयटी अशा संस्थांची उबारणी जायत आसा आनी केल्या. आयुषमान भारत, कुशळटाय विकास, गरीब कल्याण येवजण अश्यो विवीध येवजण्यो सगल्या थरांतल्या लोकां खातीर राबयल्यात. ह्याच विकासकामांच्या बळार भाजप दोनूय सुवातो जिखतलो असो विस्वास धेंपो हांणी उक्तायलो.
आमदार दिगंबर कामत हांणी सांगलें, भाजपान लोकसभा वेंचणुके खातीर दक्षीण गोंयांत पल्लवी धेंपो हांकां उमेदवारी जाहीर केल्या. पल्लवी धेंपो मडगांवच्यो, तांचें शिक्षणूय हांगाच जालां. लग्न जाले उपरांत त्यो पणजे गेल्यो. पूण दक्षीण गोंया कडेन, जल्मभुंये कडेन तांची नाळ तुटिल्ली ना. ही वेंचणूक देशाची वेंचणूक आसा. भारताची विदेशांतली प्रतिमा प्रधानमंत्री नरेंद्र मोदी हांकां लागून बदल्ल्या. 2047 त भारत देश विश्वगुरू जातलो. देशाची अर्थवेवस्था संवसारांत पांचव्या क्रमांकाचेर आसून रोखडीच ती तिसऱ्या स्थानार हाडपाची मोख आसा. फुडली पांच वर्सां देश कोण चलयतलो हें ही लोकसभा वेंचणूक थारायतली. ताका लागून मतदारांनी हाचो विचार करून भाजपा फाटल्यान खंबीरपणान उबे रावप गरजेचें आसा.
कतारांत ख्यास्त जाल्ल्या भारतीयांची सुटका, अबुधाबीत देवळाची उबारणी हें प्रधानमंत्री मोदी हांचें येस आसा. ताका लागून मतदारांनीय दक्षीण गोंयांत भाजप उमेदवाराक वेंचून हाडपाची गॅरंटी दिवची. पयल्यो बायल खासदार वेंचून दिवन इतिहास घडोवापची संद दक्षीण गोंयांतल्या मतदारांक आसा अशेंय दिगंबर कामत हांणी मुखार उलयतना म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
