भांगरभूंय | प्रतिनिधी
नवी दिल्ली, खबरां संस्था ः अयोध्येंतलो राम जन्मभूमी वाद आनी तातूंतल्यान निर्माण जाल्ल्या आंदोलन प्रकरणांत एनसीईआरटीन म्हत्वाचे बदल केल्यात. 1992 वर्सा बाबरी मशीद उडोवपाचो उल्लेख पुस्तकांतल्यान वगळ्ळा आनी 2019 वर्सा सर्वोच्च न्यायालयान राम मंदिर बांदपाक फाटबळ दिल्ल्या निर्णयाचो नवो उल्लेख केला.
2024- 25 शिक्षणीक वर्सा खातीर एनसीईआरटीन 12 वेच्या पुस्तकांत हालींच्या केल्ल्या बदलां विशीं म्हायती सीबीएसईक दिल्या. हे बदल राज्यशास्त्राच्या ‘स्वातंत्र्या उपरांतच्या काळांतलें भारतीय राजकारण’ ह्या पुस्तकाच्या आठव्या धड्यांत केल्यात. ह्या प्रकरणांत अयोध्या आंदोलन,1989 त काँग्रेसीचो हार, मंडल आयोग, 1991 सावन जाल्ल्यो अर्थीक सुदारणा आनी 1991 त जाल्ली राजीव गांधीची हत्या ह्या भारतीय राजकारणाचेर प्रभाव घालपी पांच मुखेल घडणुकांची म्हायती आसा. पुस्तकाच्या 148 ते 151 पानांचेर अयोध्या प्रकरण आसा.
ह्या प्रकरणांत ‘सुदारणा’ केल्यात. एनसीईआरटीच्या संकेतथळार दिल्ले म्हायती प्रमाण, नव्या घडामोडीं सयत बदल केल्यात. सर्वोच्च न्यायालयाच्या निर्णयाक लागून आनी ताका देशभरांतल्यान मेळिल्लो येवकार हाका लागून अयोध्या प्रकरणांत म्हत्वाच्यो घडामोडी घडिल्ल्यान जायते बदल जाल्यात. हे संबंदी सगली म्हायती वेबसायटीचेर उपलब्ध आशिल्ल्याचे एनसीईआरटीचे संचालक दिनेश सकलानी हांणी सांगलें.
सारांशांत बदलः उल्लेख केल्ल्या प्रकरणाच्या सारांशांतल्यानय बाबरी मशिदी मोडपाचो उल्लेख वगळ्ळा. ‘रामजन्मभूमी आंदोलनाचो परिणाम कितें आनी राजकी आंदोलन म्हणून बाबरी मशिदी उडोवपाचें म्हत्व कितें?’ असो एक प्रस्न आशिल्लो तो काडून ‘रामजन्मभूमि आंदोलनाचो परिणाम कितें?’ हो प्रस्न दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
