भांगरभूंय | प्रतिनिधी
जायते लोक शिजयल्ल्या अन्नाची नाशाडी जावची न्हय म्हणून तें फ्रिजांत दवरतात. आनी कांय वेळा उपरांत वा दुसरे दिसा तें गरम करुन खातात. पूण आतां गीम सुरू जाला. देखून बरोच तेंप फ्रिजांत दवरिल्ले अन्न भलायके खातीर बरें न्हय. सध्या तापमान वाडत आसा. अशे परिस्थितींत अन्न इबाडपाचो धोको आसता. देखून चड वेळ फ्रिजांत दवरिल्ले अन्न खाल्ल्यार भलाकेक लुकसाण जावंक शकता.
कांय जाण आपलो फ्रिज सारको निवळ करिनात. हाका लागून फ्रिजांत विशाणू, किडींचें प्रजनन जावंक शकता. हे किडे फ्रिजांत सांठोवन दवरिल्ल्या अन्नाचेर बसतात आनी ताका संसर्ग जावंक शकतात. अशें अन्न खाल्यार पोटाच्या जायत्या दुयेंसांचो धोको वाडटा. देखून तुमचो फ्रिज पुरायपणान निवळ दवरप म्हत्वाचें. तशेंच चड अन्न सांठोवचे न्हय. अशें केल्यार फ्रिजांत हवे खातीर सुवात उरना. आनी जायत्या तरांचे बॅक्टेरिया वाडपाचो धोको आसता.
दरेक अन्न फ्रिजांत दवरपाचे वेळ वेगळो आसता अशें दोतोर सांगतात. भाजी 3- 4 दीस फ्रिजांत दवरूं येता. फळां सप्तकभर दवरूं येतात. हाचेभायर तांतयां, बीन्स आनी मांस दोन दिसांनी खावपाक जाय. पूण शिजयल्लें अन्न पांच ते स वरां परस चड वेळ फ्रिजांत दवरूंक फावना.
अन्न शिजयल्या उपरांत 1 ते 2 वरां भितर ते फ्रिजांत दवरचें. ह्या वेळार फिडांचे तापमान 2 ते 3 अंशां मदीं आसपाक जाय हें लक्षांत दवरात. तयार केल्ली भाजी 3 ते 4 वरां फ्रिजांत दवरून ती खावची. भाजी भायर काडले उपरांत पयलीं ती गरम करची. तशेंच कच्चें आनी शिजयल्लें अन्न वेगवेगळे फ्रिजांत दवरचें.
थारायिल्ल्या वेळा परस चड वेळ फ्रिजांत दवरिल्ले अन्न खाल्ल्यार जायत्या दुयेंसांचो धोको जावंक शकता. जायत्या प्रकरणांनी शिजयल्लें अन्न इबाडले तरी ताचो वास येना आनी लोक ते बरें आसा समजून खातात, पूण अशें अन्न खाल्यार अन्न विखारीपण ते टायफॉयड मेरेन धोको आसता. अशें जाता कारण चड काळ फ्रिजांत दवरिल्ल्या अन्न पदार्थांत धोक्याचे बॅक्टेरिया वाडूंक लागतात. जें पोटांत भितर सरून अन्न विखारी आनी टायफॉयड सारकिल्ले दुयेंस निर्माण करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
