भांगरभूंय | प्रतिनिधी
कारवाय करपाची नुस्तेमारांची मागणी
भांगरभूंय । प्रतिनिधी
मडगांव: गोंयचे दर्या शिमेंत येवन कर्नाटकांतल्यो बोटी नुस्तेमारी करतात. तशेंच एलईडी लायटी वरवीं नुस्तेमारी सुरू आशिल्ल्यान परंपरीक नुस्तेमारांक मेळपी नुस्त्याच्या प्रमाणांत उणाव आयला, अशी म्हायती बाणावलीचे नुस्तेमार पेले फर्नांडीस हांणी दिली. तशेंच मुख्यमंत्र्यांनी ह्या प्रकरणांत लक्ष घालून कारवाय करची अशी मागणीय नुस्तेमारांनी केल्या.
गोंयच्या नुस्तेमारांनी उण्या जाल्ल्या नुस्त्याच्या उत्पादना विशीं हुस्को उक्तायला. हे विशीं उलयतना परंपरीक नुस्तेमार पेले फर्नांडीस हांणी सांगलें, हाचे पयलीं फांतोडेर नुस्तेमारी खातीर दर्यांत बोट घालताले. चार वरांनी परतून आयले उपरांत तीन ते चार खोंटले नुस्तें मेळटालें. पूण आतां अर्दो ते एक खोंटलो नुस्तें मेळटा. नुस्तें मारपा खातीर दर्यांत गेले उपरांत कर्नाटक आनी हेर राज्यांतल्यो स्पीड बोटीं नुस्तेमारी करीत आशिल्ल्याचें दिसून येता. गोंया भायल्यो ह्यो बोटीं गोंयचे शिमेंत येवन नुस्तेमारी करतात. त्यो बोटी येतना 10 ते 12 बोटी मेळून येतात. दर्यादेग तटरक्षक दळाच्या पुलिसांक हाची म्हायती दिल्यार ते यो म्हणसर देड वर लागता. तांचे कडेनूय स्पीड बोटींचो उणाव आसा. तांकां राज्य सरकार आनी नुस्तेमार खात्या कडल्यान गरजेच्यो त्यो स्पीड बोटी गस्ती खातीर उपलब्ध करून दिवपाची गरज आसा, अशें फर्नांडीस हांणी म्हणलें. गोंयच्या दर्यांतल्यान नुस्तें व्हरपी दुसर्या राज्यांतल्या बोटींचेर कारवाय जायना. तो मेरेन गोंयच्या नुस्तेमारांक, रापणकारांक नुस्तें मेळचें ना. रातभर त्यो बोटी नुस्तेमारी करतात आनी फांतोडेर वतात. ह्या गोंया भायल्या बोटींचेर कारवाय करपाची मागणी पेले फर्नांडीस हांणी नुस्तेमार मंत्र्या सयत मुख्यमंत्र्या कडेन केल्या. एलईडी नुस्तेमारी अजून लेगीत चालूच आसा. ताचे कडेनूय नुस्तेमार खात्या कडल्यान आडनदर जायत आशिल्ल्याचें फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
