भांगरभूंय | प्रतिनिधी
आचार्य विनोबा भावे हांकां आधुनिक संत म्हूण सगळे वळखतात. तांची भूदान चळवळ गाजली. ते सुटके झुझारी लेगीत आसले. तशेच लेखकूय. 1940 सालान महात्मा गांधीजींनी सत्याग्रह चळवळ सुरु केली, तातूंतले पयले सत्याग्रही म्हूण भावेक गांधीजीन वेंचून काडले. 1940 ची चळवळ मागीर 1942 ची चले जाव चळवळ. हातूंत ते वांटेकार जाले. ते सर्वोदय नेते म्हूण प्रसिद्ध आशिल्ले. तांणी बरींच पुस्तकां बरयल्यांत. जशी गीता प्रवचनां, ध्यान ते सांगतो पुन्हा विनोबा, अमृत बिंदू, धम्मपद, अग्निमंत्र भूदान ते ग्रामदान, ग्रामदान का आणि कसे ? ग्रामदान ग्रामस्वराजासाठी, ग्रामदान प्रश्नोत्तरी, अशोभनीय पोस्टर्स, काश्मीर समस्या , सांप्रदायिक हिंसा, बिहार आंदोलन, विनोबाजींचे विचार, ग्रामदान, प्रखंड दान, आश्रम प्रश्नोपनिषद, आश्रम दिग्दर्शन, आश्रम जीवन, भाषेचा प्रश्न, चीन भारत सीमा संघर्ष, माझ्या दृष्टीतून जैन धर्म, ज्ञानदेव चिंतनीक, मूळ उद्योग कांतणे अशीं लागीं लागीं 116 पुस्तकां बरयल्यांत. तातूंतले ‘मधुकर’ हो बारीक लेखांचो झेलो. हातून 40 लेख आनी 9 प्रासंगिक लेख आसात. हांवे तांचो मुद्दाम अणकार केला. कारण म्हाका हो प्रकार खूब आवडटा आनी म्हजी पुस्तकां लेगीत ह्याच विशयाचेर आसात.
1) म्हातारो तर्क
एखाद्या मनशाची पिराय जर व्हड आसत तर आमी ताका म्हातारो म्हणटात. अशे म्हातारे आमच्या देशान हालींच्या दिसांनी खूब उणे दिसतात. आमच्या लोकांची जगपाची सरासरी पिराय हालींच्या दिसांनी 24 वर्सां आसा. हेंच परदेशांनी दोपटीन आसता. थंय म्हातारे मनीस बरेच दिसतात. पूण आमचे कडे असले म्हातारे उणे आसले तरी दुसऱ्या एके तरेचे म्हातारे चड आसात. हे म्हातारे कोण? नवे शिकपाची उमेद गेल्ले ते म्हातारे अशे एका सत्पुरुषान म्हळां. असले म्हातारे वचत थंय पळोवपाक मेळटात. ल्हानपणान जितले नशिबाक लागले तितलेच हें खरें! ह्या उपरांत थोडे व्हड जातकच एखादो धंद्याक लागत, आनीक कितें शिक म्हळ्यार जायना. हें आळशीपण शिकिल्ल्या आनी शिकूंक नाशिल्ल्या दोनूय लोकां मदीं कित्याक आसता तर घडयेक गुलामगिरी खातीर आसूं येत. शिकिल्ल्या लोकां मदीं तो चडच आसा कमी ना.
रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
