भांगरभूंय | प्रतिनिधी
भांगरभूंय । प्रतिनिधी
म्हापशेंः गोंय रिअल ईस्टेट नियंत्रण प्राधिकरणान (गेरा) दिल्ल्या आदेशाची कार्यवाही करपाक अपेस आयिल्ले खातीर पणजेच्या प्रधान जिल्हो न्यायालयान प्रभू मोनी बिल्डराचो धनी व्यंकटेश प्रभू मोनी हाचे आड पकर वॉरन्ट काडलां. आदेशाक पाळो दिलो ना म्हणून मोनी हाका सुमार तीन म्हयन्याची बंदखण जावपाक शकता.
प्रभू मोनी बिल्डरान म्हापशें हांगा बांदल्ल्या प्रभू चेंबर्स ह्या वेवसायीक इमारतींत जे दोश आसात ते पयस करपाचो आदेश गेरान मोनी हाका दिल्लो, मात ताणे ते संबंदी कांय करूं ना म्हणून न्यायालयाक ताचे आड पकड वॉरन्ट काडपाचो आदेश दिवचो पडलो.गेरान दिल्ल्या आदेशाची मोनी हाणे कार्यावाही केली ना अशी कागाळ डिक्री होल्डरानी न्यायालयांत केल्ली.
2012 वर्सा डिक्री होल्डरांनी प्रभू चेबरांत ऑफीस सुवात विकती घेतिल्ली. मात तिचो ताबो दिवपाक मोनी फाटीं फुडें करता देखून तांणी 2019 वर्सा गेरा कडेन कागाळ केल्ली. 17 मार्च 2022 आनी 30 नोव्हेंबर 2022 दिसा गेरान मोनी हांका डिक्री होल्डरांक लुकसाण भरपाय म्हणून 9 कोटी रुपये दिवपाचो आदेश दिल्लो.
बांदकामांत जे दोश आसात ते पयस करून डिक्री व्होल्डरांक तांच्या सुवातेचो ताबो थारायल्ल्या वेळार दिवपाक गेरान सांगल्लें. डिक्री होल्डरांनी लिफ्ट, फायर एनओसी आनी हेर गाजलीं विशीं गेरा कडेन कागाळी केल्ल्यो. गेराच्या आदेशाक पाळो दिलो ना अशी डिक्री व्होल्डराची फटवणूक केल्ले खातीर प्रधान जिल्हो न्यायाधीश शेरीन पवाल हांणी मोनी हाचे आड पकड वॉरन्ट काडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
