भांगरभूंय | प्रतिनिधी
भांगरभूंय । प्रतिनिधी
वाळपयः वाळपय वाठारांतल्या जायत्या गांवांक उदका पुरवण करपी दाबोस उदका प्रकल्पाची पायपलायन मासोर्डें हांगा फुटल्ल्यान फाटल्या दोन दिसां सावन उदका पुरवण बंद पडल्या. ती सारकी करपाचें काम बिरेस्तारा सांजे मेरेन पुराय जालां. शुक्रार मेरेन उदका पुरवण पयली भशेन सुरू जातली अशें बांदकाम खात्याच्या उदका पुरवण विभागाच्या अधिकाऱ्यांनी सांगलें.
बुधवारा ही पायपलायन अकस्मात फुटिल्ल्यान माऊस पंचायत वाठार, खोतोडें आनी वाळपय पालिका वाठारांतल्या उदका पुरवणेचेर परिणाम जालो. पायपलायन फुटिल्ल्याची खबर मेळटगीर अधिकाऱ्यांनी बुधवारा तिची पळोवणी करून ती सारकी करपाचें काम सुरू केलें. रातयां 2 वरां मेरेन हें काम चलताले. बिरेस्तारा दीस भर काम करून पायपलायन सारकी केली. नळांतल्या उदक येवप बंद जाल्ल्यान लोकांक पियेवपाक उदक नाशिल्ल्यान तांची सामकी गैरसोय जाली.
वाळपय- मासोर्डें बांदार ही पायपलायन फुटली. ती कित्याक लागून फुटली हाचें कारण सामकार आयलें ना. हजारांनी लीटर उदक व्हांवन गेले. जे कडेन पायपलायन फुटल्या थंय नवे पायप घातल्यात. बांदकाम खाताच्या अधिकाऱ्यांनी बुधवाराच पायपलायन सारकी करपाचें काम सुरू केलें. बुधवारच्यान उदका पुरवण बंद जाल्ल्यान उदकाचो उणाव जाला हें आमकां खबर आसा. मात आमी कसलेच तरचें घाळपण करनासतना दुरुस्तीचें काम बुधवारा मध्यानरातीं मेरेन चलयल्लें. बिरेस्तारा कांय गांवांत उदक मेळ्ळां. शुक्रार मेरेन परिस्थिती सुदारतली आनी उदका पुरवण सुरळीत जातली अशें अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
