भांगरभूंय | प्रतिनिधी
काँग्रेसीचे सर्वेक लागून मतभेद, नवो चेरो सोदपाची सुचोवणी
अजून मेरेन काँग्रेसीचो उमेदवार जाहीर करपाक बरोच कळाव जाल्ल्यान कार्यकर्ते गोंदळांत आसात. हाचें कारण म्हणल्यार गोंय प्रदेश काँग्रेस समितीन धाडिल्ली उमेदवारांची नांवां अखील भारतीय काँग्रेस समितीक पसंद नात. देखून काँग्रेसीन नव्या चेऱ्याचो सोद घेवपाचें काम सुरू केलां अशी म्हायती काँग्रेसीतल्या गोपांनी दिली.
काँग्रेसीची कांय दिसां पयलीं केंद्रीय वेंचणूक समितीची बसका जाली. प्रदेश काँग्रेसीन उमेदवारांचो अहवाल केंद्रीय समितीक सादर केला. तसोच एक अहवाल गोंयच्या उमेदवारां विशीं काँग्रेसीच्या केंद्रीय समिती कडेन आसा. पूण दोनूय अहवाल पळयल्यार तातूंत बरोच फरक आसा आनी काँग्रेसीच्या केंद्रीय समिती भितर मतभेद निर्माण जाल्यात. ह्या कारणांक लागून उमेदवार जाहीर करपाक कळाव जाता अशी म्हायती गोपांनी दिली.
जो सर्वे आनी इंटेलिजेन्स अहवाल अखील भारतीय काँग्रेसीक मेळ्ळा तो अहवाल प्रदेश काँग्रेसीन धाडिल्ल्या उमेदवारांच्या नांवां कडेन जुळना. देखून केंद्रीय समिती ह्या नांवांचेर खूश ना आनी नवीन चेऱ्यांचो सोद घेवपाक तांणी सांगलां अशे गोपांनी सांगलें.
हे विशीं गोंयचे आदले सभापती आनी काँग्रेसीचे प्रदेश वेंचणूक समितीचे वांगडी शंभू बांदेकार हांणी सांगलें की, स म्हयन्यां पयलीं 8 नांवां उत्तर आनी दक्षिणेंतल्यान केंद्राक धाडिल्लीं. तातूंत नवे आनी केन्नाच पंचायतींत लेगीत वेंचून येवंक नाशिल्ल्या उमेदवारांची नांवां आशिल्लीं.
हीं नांवां धाडल्यार काँग्रेसीतले जाण्टे आनी वरिश्ठ कार्यकर्त्यांचेर परिणाम जातलो म्हूण सांगिल्लें. पूण तांणी म्हजे आयकूंक ना आनी तशींच नांवां धाडलीं. स म्हयन्या पयलींच हांवें पक्षश्रेश्ठींक पत्र बरोवन सांगिल्लें की लोकसभा वेंचणूक लागीं पावल्या देखून काँग्रेसीचेर प्रचार करतना ताण येवचो न्हय, ते खातीर रोखड्या रोखडो उमेदवार जाहीर करात. जेन्ना खुबूच उशीर जालो तेन्ना परतून हांवें आठ दीस पयलीं पक्षश्रेश्ठींक सांगलें की आतां नव्या चेऱ्यांचेर लक्ष दिवं नाकात. जांकां आपल्या मतदारसंघाची पुराय म्हायती आसा आनी जे पोरणें लोक वेंचून आयल्यात तांकांच आतां संद दियात अशें बांदेकार हांणी सांगलें.
दक्षीण गोंयांत काँग्रेसीच्या प्रचाराची धुरा सांबाळपी गोंय युवा काँग्रेसीचे युवा अध्यक्ष जोएल आन्द्राद हांणी सांगलें, थळाव्या पांवड्यार आमचो प्रचार पयलींच चालीक लागला. आमी येता ते वेचणुकेक तोंड दिवपाक तयार आसात.
काँग्रेस पक्षान 10 दीस पयलीं तरी उमेदवार जाहीर करपाक जाय आशिल्लो अशें म्हाका दिसता, पूण ह्या कळावाक लागून वेंचणुकेचेर कसलोच परिणाम जावचो ना. पक्ष चिन्नाच्या बळार प्रचार करता. 2019 चे लोकसभा वेंचणुकेंत एक म्हयन्या परस उणो वेळ दक्षीण गोंयचे खासदार फ्रान्सीस सार्दीन हांकां दिल्लो. तरी लेगीत ते जैतिवंत थारले अशें आंन्द्राद हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
