भांगरभूंय | प्रतिनिधी
म्हापशें, प्रतिनिधी ः लग्न करतां अशें सांगून तरणाटेचेर लिंगीक अत्त्याचार केल्ल्या दुबावीत ऍन्थनी फर्नांडीस (नास्नोळा) हाची पुरावे नाशिल्ल्यान निर्दोश सुटका केली. पणजेच्या फास्ट ट्रॅक विशेश न्यायालयाची (पोस्को) न्यायाधीश दुर्गा मडकयकार हांणी हो निवाडो दिलो.
दुबावा बगर गुन्यांव सिद्ध करपा खातीर हेर कसलोच पुरावो रेकाॅर्डाचेर ना. पिडेस्तान वैजकी तपासणी करपाक न्हयकार दिलो. पिडेस्ताचे वैजकी तपासणेचे अहवाल रेकॉर्डाचेर सादर करूंक ना. तशेंच कागाळदाराचें लग्न जाल्लें काय आनी तिचें लग्न तिगलेलें काय ना हाची पडताळणी चवकशी अधिकार्यांनी करूंक ना. ताका लागून सरकारी पक्षाचो हो खटलो दुबावाचेर सिद्ध करपाक कसलोच पुरावो नोंद ना, असो निश्कर्श ह्या निवाड्यांत न्यायालयान नोंद केला.
ह्या खटल्याचे सुनावणे वेळार दुबावीताच्या वतीन ऍड. मायकल नाझारेथ हांणी सरकारी पक्षा वतीन विशेश सरकारी वकील ऍड. एम. मराठे हांणी युक्तीवाद केलो.
मजगतीं, २७ फेब्रुवारी २०२० दिसा म्हापशें पुलिसांनी हो गुन्यांव नोंद केल्लो. मडगांवचे कागाळदार बायलेन दुबावितान आपले कडेन इश्टागत करून आनी उपरांत लग्न करतलों अशें सांगून ८ डिसेंबर २०१९ ते २० फेब्रुवारी २०२० ह्या काळांत बलात्कार केल्ल्याचो आरोप केल्लो. हे कागाळीच्या आदारान पुलिसांनी ऍन्थनी फर्नांडीस हाका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
