भांगरभूंय | प्रतिनिधी
नवी दिल्ली, खबरां संस्था ः लोकसभा वेंचणुकेचे फांटभूंयेर भाजपांत येवपी लोकप्रतिनिधींचो आंकडो वाडला. 2014 ते 2024 ह्या काळांत केंद्र सरकारान केल्ल्या कामाची आनी उदरगतीची गॅरंटी दिवन भाजपा मतां मागता. ह्या धा वर्सांत केंद्रीय तपास एजन्सीच्या रडाराचेर आशिल्ले विरोधी पक्षांचे 25 आघाडेचे फुडारी भाजपांत आयल्यात. विशेश म्हळ्यार हातूंतल्या 23 जाणांक तपास, चवकशेंतल्यान सुटका मेळ्ळ्या.
ही म्हायती ‘द इंडियन एक्सप्रेस’चे एके अहवाल बातमेंतल्यान स्पश्ट जाल्या. विरोधी पक्षांतले जे 25 फुडारी भाजपात गेल्यात तांतूत काँग्रेसीचे 10, राष्ट्रवादी काँग्रेसीचे 4, शिवसेनेचे 4, टीएमसीचे 3, टीडीपीचे दोन जाल्यार सपा आनी व्हायएसआर सीपीचे दरेकी एका फुडारांच्यो आस्पाव आसा. 25 फुडाऱ्यां मदल्या 23 फुडाऱ्यांक सुटका मेळ्ळ्या म्हळ्यार तीन केशी बंद जाल्यात. जाल्यार हेर 20 प्रकरणां सध्या थंड पडल्यांत. ह्या एका वर्सात स फुडारी भाजपांत आयल्यात.
हो अहवाल 2022 वर्सा परस सामको वेगळो आसा
इंडियन एक्सप्रेसान 2022 वर्सा केल्ल्या चवकशी अहवालांत 95 टक्के राजकारण्यांचेर ईडी आनी सीबीआय हांणी कारवाय केल्ल्याचें उक्तें जालें. 2014 वर्सा मोदी सरकार आयलें तेन्ना हे सगळे विरोधी पक्षांत आशिल्ले. आतांचो अहवाल ताचे परस सामको वेगळो आसा. भाजपांत येतकच तांकां क्लीन चिट मेळटा आनी हाकाच विरोधी पक्षांनी भाजपाक ‘वॉशिंग मशीन’ अशें म्हणलां. आयजूय म्हणटात.
महाराष्ट्रातले फुडारी चड
2009 वर्सा देशांत काँग्रेसीच्या फुडारपणाखाला युपीए सरकार आशिल्लें. त्या काळांतय ‘इंडियन एक्सप्रेसा’न असोच तपास अहवाल छापिल्लो. मायावती आनी मुलायम सिंह हांचेर केल्ल्या भ्रश्टाचाराच्या आरोपांत सीबीआयन कांय नोटींगां बदलल्यात हें उजवाडाक आयिल्लें. 2022 ते 2023 ह्या काळांत महाराष्ट्रांत ईडी नोटीस आयिल्ल्याचें प्रमाण वाडलां अशेंय अहवालांत म्हणलां.
2022 वर्सा एकनाथ शिंदे हांणी उद्धव ठाकरेंच्या फुडारपणाचेर प्रस्नचिन्न उबें करून भाजपा वांगडा सरकार तयार केलें. हे राजकी घडणुकेक एक वर्स जाले उपरांत अजीत पवार हांणी राष्ट्रवादी सोडून शरद पवारांच्या फुडारपणाक हरकत घेतली आनी सत्तेर वांटो घेतलो. अजीत पवार सत्तेर आयले उपरांत अजीत पवार आनी प्रफुल्ल पटेल हांचे आड आशिल्ली प्रकरणा शांत जाली. 25 जाणांच्या वळेरेंत 12 फुडारी महाराष्ट्रांतले आसात. विशेश म्हणल्यार हातूंतल्या चडश्या फुडाऱ्यांचेर भाजपानूच भ्रश्टाचाराचे आरोप केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
