भांगरभूंय | प्रतिनिधी
संगारेड्डी, खबरां संस्था ः तेलंगणाच्या सांगारेड्डी जिल्ह्यांतल्या एसबी ऑर्गेनिक लिमिटेड ह्या रासायनीक कारखान्यांत जाल्ल्या रिएक्टराच्या स्फोटांत पांच जाणांक मरण आयलें. जाल्यार 10 जाण जखमी जाल्यात. बुधवारा (ता. 3) सांजवेळार सुमार 5 वरांचेर ही घडणूक घडली. ह्या स्फोटाच्या उज्यांत आनीक कितलेशेच लोक आडकून पडिल्ले, अशी म्हायती अधिकाऱ्यांनी दिली. मरण आयिल्ल्यांचो आंकडो वाडपाचीय शक्यताय आसा. प्रसार माध्यमांच्या खबरां प्रमाण स्फोटाच्या वेळार इमारतींत 50 लोक आशिल्ले.
हो कारखानो चांदूर गांवांत आसा. स्फोटा उपरांत कारखान्यांतल्यान काळो धुंवर भायर येवंक लागलो. तेन्ना लोकांनी रोखडीच पुलिसांक म्हायती दिली. उपरांत उजो पालोवपी दळ आनी अॅम्ब्युलन्स घडणूक सुवातेर आयली. जखमींक उपचारा खातीर हॉस्पिटलांत दाखल केल्यात.
मुख्यमंत्र्यान उक्तायलें दुख्ख
तेलंगणाचे मुख्यमंत्री रेवंत रेड्डी हांणी स्फोटाक लागून दुख्ख उक्तायलां. एसबी ऑर्गेनिक कंपनीच्या रिएक्टरांत जाल्लो स्फोट धक्को दिवपी घडणूक आसा अशें तांणी ‘एक्स’चेर केल्ल्या पोस्टांत म्हणलां. जखमींचेर सगळ्यांत बरें उपचार करपाची सुचोवणी हांवें दिल्या अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
