भांगरभूंय | प्रतिनिधी
न्यूयाॅर्क, खबरां संस्था : ‘मेटा’ कंपनीच्या व्हॉट्सप, इन्स्टाग्राम ह्या लोकप्री अॅप्सांची सेवा रातीं अर्द वर बंद आशिल्ली. ताका लागून संवसारभर बोवाळ जालो. बुधवारा रातीं ११.४५ वरांचेर खुबश्या देशांनी व्हॉट्सअॅप, इन्स्टाग्राम सेवा बंद केल्ली. ह्या वेळार युजर्सांनी पले व्हॉट्सऍप अकावंट तपासपाचो यत्न केलो. मात तांकां मॅसेजी दिसनाशिल्ल्यो. जे लोक लॅपटॉप वा डेस्क टाॅपा वयल्यान वेब व्हॉट्सप वापरतात ते आपशीच लॉगआवट जाल्ले.
फेसबूक, व्हॉट्सअॅप वा इंस्टाग्राम अॅप जेन्ना बंद पडटात तेन्ना ‘एक्स’ वापरपी मिम्सचो पावस करतात. मात हे खेपे व्हॉट्सऍपान सरळ एक्साचेर पोस्ट करून ही खबर उक्ती केली. व्हॉट्सऍपान रातचें एक निवेदन जारी केलें. तातूंत म्हणलां, कांय वापरप्यांक व्हॉट्सअॅप वापरपाक अडचणी येतात हें आमी समजतात. आमी ताचेर काम करतात आनी बेगीन पुराय क्षमतेन व्हॉट्सअॅप सुरू करपाचो यत्न करतात.
मेटाचे अॅप बंद पडपाची ह्या वर्साची ही दुसरी घडणूक. मार्च म्हयन्यांत फेसबूक, इन्स्टाग्राम आनी थ्रेड्सची सेवा बंद पडिल्ली. अचकीत ते लॉग आवट जाताले. उपरांत कांय जाणांक परत लॉग इन करपाचो पर्याय दाखयताले. जाल्यार कांय जाणांक लॉगइन करतना ऑथेंटिकेशन कोड येवपाक आडखळी येताल्यो. उपरांत एक्साचेर खुबश्या जाणांनी मिम्स आनी कागाळी मांडले उपरांत कांय वेळान मेटाचे अॅप सुरळीत सुरू जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
