भांगरभूंय | प्रतिनिधी
केरी-सत्तरी: हेरांचेर मोग करप, तांकां मजत करप, तांचे विशीं वायट न उलोवप, तांचो दुस्वास न करप, हेरांक वायट दिसतलें अशें न वागप अशे तरेचे बरे गूण भुरग्यांनी आपणावन आपली जीण सुंदर आनी संस्करमाय करप गरजेचें आसा. आपले भायले सुंदरताये परस अशा संस्कारमय गुणांनी भरिल्ली भितरली सुंदरताय खूब म्हत्वाची आशिल्ल्यान भुरग्यांनी अशें सुसंस्कारीत विचार आपणावचें अशें उलोवप बाल संस्कार कार्यकर्ते आनी संवेदन केंद्राचे प्रशिक्षक बाबनी मापारी हांणी केलें.
गाळवाडो, निरंकार फोंडें हांगासरल्या सरकारी मुळावे शाळेंत सांखळेच्या संवेदन केंद्र ह्या संस्थे वतीन ‘आनंदादायी शिक्षणांतल्यान जिणे कुशळटायेची वळख’ हाचेर आदारीत कार्याशाळा हालींच जाली. हे कार्यशाळेक भुरग्यांक मार्गदर्शन करतना बाबनी मापारी उलयताले.
ह्या वेळार संवेदन केंद्राचे कातकरी प्रकल्प समन्वयक दशरथ मोरजकार, विद्यालयाच्या पालक शिक्षक संघाचे अध्यक्ष प्रभा गांवकार, विद्यालयाच्यो मुख्याध्यपिका संगीता नायक, शिक्षिका पुष्पा बोरकार बी मानेस्त हाजीर आशिल्ले.
ह्या वेळार कार्यशाळेंत पदां, खेळ, कृतियुक्त कार्यावळ बी उपक्रम भुरग्यांक सहभागान करून भुरग्यांक संवाद कुशळटाय, सृजनात्मक विचार, समस्यांचें निवारण, निर्णयाची तांक बी जिणे कुशळटायेची वळग करून दिली. बाबनी मापारी आनी दशरथ मोरजकार हांणी पराय शाळेच्या वेळांत आनंददायी रितीन हो उपक्रम पार पाडलो. हे कार्यशाळेक विद्यालयाच्या 30 भुरग्यांनी वांटो घेतिल्लो.
ह्या उपक्रमा विशीं उलयतना पालक शिक्षक संघाचे अध्यक्ष श्री. गांवकार हांणी तोखणाय करून भुरग्यांनी मजा मस्ती करून आनंदान शिक्षण घेवंक जाय, आनी कार्यशाळे वेळार भुरग्यांनी बऱ्यो गजाली शिकून घेतिल्ल्याचें दिसून येता. ताका लागून प्रकारच्यो कार्यावळी आनीक जावप गरजेचें आशिल्ल्याचें सांगलें.
मुख्याध्यापिका संगिता नायक हांणी सुरवेक येवकार आनी प्रास्तावीक केलें आनी उपकार मानले. कार्यशाळे वेळार पालकांची हाजेरली आनी सहकार्य मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
