भांगरभूंय | प्रतिनिधी
पणजी: हांगासरल्या मध्यवर्ती वाचपघरा कुशीक सोमारा रातीं धाड घालून पणजी पुलिसांनी प्रितेश गावडे (25, पिसुर्लें-सत्तरी) ह्या तरणाट्याक अटक केली. ताचे कडल्यान 1.14 लाख रुपया मोलाचो 1.14 कील गांजो, 400 रुपया आनी मोबायल जप्त केला.
पणजी पुलिसांनी दिल्ले म्हायती प्रमाण एक तरणाटो पाटो मध्यवर्ती वाचपघरा कुशीक घुंवळे वखदां तस्करी खातीर येवपाचो आसा अशी म्हायती मेळिल्ली. ते प्रमाण उत्तर गोंय जिल्हो पुलीस अधिक्षक अक्षत कौशल आनी उपअधिक्षक सुदेश नायक हांच्या मार्गदर्शना खाला पुलीस निरिक्षक विजयकुमार चोडणकार हांच्या फुडारपणा खाला उपनिरिक्षक अमीर तरल, कॉ. गुलशन नायक, प्रथमेश मळीक, गौतम मटकार आनी हेर पंगडान सोमारा रातीं 10.35 ते उत्तररातीं 1.15 वरांचेर सांपळो रचलो.
ह्याच वेळार गुप्तहेरांनी दिल्ले म्हायती प्रमाण एक तरणाटो ते सुवातेर दुबावीत रितीन भोंवत आशिल्ल्याचें पंगडाचे नदरेक आयलें. ताका ताब्यांत घेवन ताची चवकशी केली तेन्ना ताणें आपूण प्रितेश गावडे (25, पिसुर्लें-सत्तरी) आशिल्ल्याची म्हायती दिली.
उपरांत पंगडान ताची झडटी घेतली. त्या वेळार ताचे कडल्यान 1.14 लाख रुपया मोलाचो 1.14 कील गांजो, 400 रुपया आनी मोबायल जप्त केलो. ह्या प्रकरणांत पुलीस निरिक्षक विजयकुमार चोडणकार हांच्या मार्गदर्शना खाला उपनिरिक्षक विराज नायक हांणी दुबावीत प्रितेश गावडे हाचे आड घुंवळे वखदां विरोधी कायद्याचें कलम 20 (बी) (ii)(बी) खाला गुन्यांव दाखल करून ताका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
