भांगरभूंय | प्रतिनिधी
मडगांव: जांबावले श्रीदामोदराचो गुलालोत्सव काल (मंगळारा) हजारांनी भाविकांचे हाजिरेंत दबाज्यान मनयलो. श्रीरामनाथ दामोदर महाराज की जय, हर हर महादेव अशा नामाचो गजर करून हजारांनी भक्तांनी पालखेचेर गुलाल उधळ्ळो आनी जांबावली संस्थानाचो वाठार गुलालान न्हावन गेल्ल्याचें दिसून आयलें.
मठग्रामस्थ हिंदू सभे वतीन जांबावलेचो शिशिरोत्सव मनयतात. हातूंत गुलालोत्सव हो मुखेल उत्सव आसता. ह्या गुलालोत्सवाक मडगांव सयत गोंयचे आनी शेजारच्या राज्यांतल्यान भावीक हाजीर रावतात. ह्या वर्सा ह्या उत्सवाचो आनंद घेवपा खातीर हजारांनी भाविकांनी गर्दी केल्ल्याचें दिसून आयलें. कोंब-मडगांव सावन सर्गेस्त पुरुषोत्तम केणी हांच्या घरां शिगम्याच्या नाल्लाची पुजा करून जांबावले श्रीदामोदर संस्थाना मेरेन मिरवणूक काडली.
मजगतीं, 27 मार्च सावन ह्या उत्सवाक सुरवात जाल्ली. ह्या काळांत दामोदर संस्थानांत विवीध नाट्यप्रयोग सादर केले. दामोदर देवस्थानांतल्या सगल्या कार्यावळींक भाविकांनी हाजेरी लायली. मंगळारा दनपारां धोल ताश्यांच्या गजरांत भावीक जांबावले गेले. पालखेचेर गुलाल उधळ्ळे उपरांत भाविकांनी कुशीक आशिल्ल्या पाणट्यार वचून न्हाण घेवन आनंद भाव मनांत दवरून भक्तीभावान परतीचे वाटेक लागले.
गुलालोत्सवा वेळार कायदो आनी सुवेवस्थेचो प्रस्न निर्माण जावचो न्हय हे खातीर पुलिसांचो बंदोबस्तूय दवरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
