वास्कोचे आदले आमदार कार्लुस आल्मेदा हांची घरवापसी

भांगरभूंय | प्रतिनिधी

कार्लुस आनी तांच्या कार्यकर्त्यांक लागून दक्षिणेंत भाजप बळिश्ट : तानावडे

वास्को, प्रतिनिधी : काँग्रेशीक आदेवश करीत वास्कोचे आदले आमदार कार्लुस आल्मेदा हांणी भारतीय जनता पक्षात घरवापसी केली. प्रदेशाध्यक्ष सदानंद शेट तानावडे, येरादारी मंत्री मावीन गुदिन्हो, पर्यावरण मंत्री आलेक्स सिक्वेरा, आमदार दाजी साळकार हांच्या हजेरीत कार्लुस हांनी भाजपात आपल्या शेंकड्यांनी कार्यकर्त्या सयत प्रवेश केलो.
2022 त विधानसभा वेचणुकेंत कार्लुस हांकां भाजपान उमेदवारी दिवंक नाशिल्ली. तेन्ना तांणी तिडकून काँग्रेशीचो ‘हात’ धरिल्लो आनी वेचणुक लढयल्ली. पुण वेचणुकेंत तांका भाजपाचे उमेदवार दाजी साळकार हांचे कडल्यान हार खावची पडिल्ली. आयज तांणी काँग्रेस सोडून भाजपात प्रवेश केलो. मुरगाव नगरसेवक ओपी फ्रेड्रीक्स रोड्रीग्स, यतीन कामुलकर, श्रद्धा महाले शेट्ये, नारायण बोरकार, सुशिला बोरकार, दाम्पाल स्वामी, माथायास मोन्तेरो आनी हेर वास्को काँग्रेश गटाच्या फुडाऱ्यांनी कार्लुसा बरोबर भाजपांत प्रवेश केलो.
दाबोळी, वास्को आनी मुरगाव हे तीन मतदारसंघ मुरगाव पालिकेंत येतात देखून कार्लुस आनी तांचो नगरसेवक आता भाजपांत आयल्ल्या कारणांन तीनूय मतदारसंघांतले लोक भाजपा वटेन रावतले आनी भाजपाक ताचो फायदो जातलो. पल्लवी श्रीनीवास धेंपो हांका निवडून हाडपांक कार्लुस आल्मेदाचो पंगड काम करतलेच आनी हेर मतदारसंघातय तांचें योगदान आसतले, अशे सदानंद शेट तानावडे हांनी सांगले.
कार्लुस काँग्रेशीन गेल्लो तरीय आमचो संपर्क तांचे कडेन सद्दां आसतालो. भाजप जेन्ना सत्तेत नाशिल्ली तेन्ना कार्लुस हे पार्टी बरोबर आशिल्ले. वास्कोंत पार्टीचे काम करपांक तांचे बरे योगदान आसा. कार्लुस परत आयिल्ल्यान भाजपांक आपलें हक्काचें घर वास्कोंत मेळ्ळां, अशे मत तानावडे हांणी उक्तायलें.
जेन्ना आदले मुख्यमंत्री मनोहर पर्रिकार भायर पडले तेन्ना पक्ष आनी सरकार कसो चलतलो हो आमकां भंय आसलो. पुण मुख्यमंत्री प्रमोद सावंत आनी तानावडेन आमचो भंय कांय दिसां भितर पयस केलो. जशे आदले प्रदेशाध्यक्ष लक्ष्मीकांत पार्सेकार हांचे खाला भाजपा एकूय वेचणुक हारुंक नाशिल्ले तेच धर्तीचेर तानावडे हे फावट दोनय मतदारसंघ लोकसभा वेंचणुकेत व्हड मताधिक्क्यान जैतिवंत करून दाखयतले, असो विश्वास कार्लुस हांणी उक्तायलो.